Астанадағы Ботаникалық бақтың субұрқақтарына шомылған балалардың ата-аналарына айыппұл салынады

Астанадағы Ботаникалық бақтың субұрқақтарына шомылған балалардың ата-аналарына айыппұл салынады. Бұл туралы Stan.kz ақпарат агенттігі хабарлайды. 

Есіл аудандық полиция басқармасы Ботаникалық бақтағы субұрқақтарда балаларын шомылдырған ата-аналарды әкімшілік жауапкершілікке тарта бастағанын хабарлады.

Ведомствоның мәліметінше, ескерту жұмыстарының тұрақты жүргізілуіне қарамастан, кейбір ересектер кәмелетке толмаған балалардың субұрқақтарда жүруіне және шомылуына жол беріп отыр. Мұндай жағдайда ата-аналар балалардың қауіпсіздігін қамтамасыз ету жөніндегі міндеттерін орындамағаны үшін жауапқа тартылады.

Оқыңыз

Қазақстандық ата-аналарға терезені ашық қалдырғаны үшін айыппұл салынатыны ескертілді Оқыңыз

Полиция қызметкерлері субұрқақтардың шомылуға арналмағанын еске салды. Бұл жарақат алуға, электр тогының соғуына және түрлі инфекциялық ауруларды жұқтыруға әкелуі мүмкін.

"Ата-аналарды қауіпсіздік шараларын сақтауға, балаларды қараусыз қалдырмауға, сондай-ақ олардың субұрқақтарда және шомылуға арналмаған өзге де орындарда суға түсуіне жол бермеуге шақырамыз. Балалардың қауіпсіздігі – барлық ересектердің ортақ жауапкершілігі", – деп мәлімдеді полиция басқармасы.

Еске салсақ, осыған дейін дәрігерлер балалар мен ата-аналарды субұрқақтардан сақ болуға шақырды. Мамандар балалардың жарақат алып немесе тоқ соғу қаупі барын ескертті.