Сот процесінде қонақүйдің күзет қызметінде ауысым бастығы болып жұмыс істейтін куәгер сөз сөйледі. Ол Мұхамедиұлын танитынын атап өтті. Алғашында оларды қонақүйдің бұрынғы қожайыны өзінің серігі ретінде таныстырған.

Куәгер Мұхамедиұлының қонақүйдің бұрынғы қожайынын қуып шыққанын айтты.

"Иә, солай болды. Фойеде жанжал болды. Мұхамедиұлы оған енді қонақүйге келме деп айқайлады. Ол ашуланып, жоғары тонмен сөйледі. Бұрынғы қожайын үнсіз отырды. Ал Мұхамедиұлы заттарды лақтырып, ұрып-соғып, айқайлай бастады. Содан бері бармендерге бұрынғы қожайынға қызмет көрсетуге тыйым салынды. Жанжал болған кезде мен сонда болдым. Екінші тараптан ешқандай қарсылық болмады", — деді куәгер.

Ол бұрынғы қожайынды қонақүйге кіргізбеуді Мұхамедиұлының өзі тапсырғанын айтты.

"Мұхамедиұлы жеке қауіпсіздік қызметкерлеріне қожайынды қонақ үйге кіргізбеу керектігі туралы ауызша нұсқау берді. Мен бұл нұсқауды жеке құрамға жеткіздім. Бұрынғы қожайынның қонақүйге келуге әрекеттенген фактілері болған. Бірақ қауіпсіздік қызметкерлері оны кіргізбеді. Мұның бәрі 2020 жылы көктемде немесе жазда болды", - деді куәгер.

Айта кетейік, Арыстанбек Мұхамедиұлына "Дипломат" қонақүйін басып алды деген айып тағылып отыр. Сонымен қатар ол билікті асыра пайдаланды және қылмыс әрекеттерін ұйымдастырды деп айыпталуда. "Ақтерек ЛТД" ЖШС құрылтайшысы мен қонақүйдің бұрынғы қожайыны жәбірленуші деп танылды.

Тергеушілердің айтуынша, қонақүйдің бұрынғы қожайыны 2019 жылы Мұхамедиұлынан көмек сұраған. Одан кейін Мұхамедиұлы жәбірленушіге 2,5 миллиард теңге беріп, бизнестің 71 пайызын сенімді басқарушыға беруді талап еткен.

Осыдан кейін Мұхамедиұлы қонақүйді түгел бақылауға алуды ұйғарған.

Талқылау