Каспийде қаза тапқан әскери қызметкерлердің отбасыларына көмек жинау аяқталды

Ақтауда Маңғыстау облысында болған қайғылы оқиғаны тергеу жөніндегі үкіметтік комиссияның кезекті отырысы өтті. Бұл туралы Stan.kz ақпарат агенттігі хабарлайды. 

Вице-премьер Қанат Бозымбаев мемлекет қаза тапқан әскери қызметкерлердің отбасылары алдындағы міндеттемелерін толық орындайтынын мәлімдеді. Заң бойынша тиесілі төлемдер кешіктірілмей аударылады. Сондай-ақ әр отбасыға қолдау көрсету үшін мамандар бекітіледі.

Бұдан бөлек, билік өкілдері қосымша көмек жинау аяқталғанын хабарлады. Қажетті қаражат арнайы қорға жиналған. 

Қаражатты бөлу үшін Қазақстан халқы Кеңесінің мүшесі Бекмұрат Жүсіповтің төрағалығымен арнайы комиссия құрылды. Билік қаражаттың атаулы әрі ашық түрде бөлінетінін және оның жұмсалуына бақылау жүргізілетінін мәлімдеді.

Оқыңыз

"Кінәлілер қатаң жазаланады": Қорғаныс министрі Каспийдегі қайғылы жағдай туралы мәлімдеме жасады Оқыңыз

Қаза тапқан және зардап шеккен әскери қызметкерлердің отбасыларына қолдау көрсету үшін бірнеше миллиард теңге көлемінде қаржы жиналды.

Партиялар мен депутаттардың көмегі

"Әділет" партиясы мен оның Іскерлік кеңесі 1,5 миллиард теңге бөлетінін мәлімдеді. Оның ішінде РАГМП атқарушы директоры Николай Радостовец – 600 миллион теңге, "Alageum Group" директорлар кеңесінің төрағасы Еркебұлан Ілясов – 300 миллион теңге, "ВД-Строй Инжиниринг" байқау кеңесінің төрағасы Еркін Оқасов – 300 миллион теңге бөлді. Эльбеги Абдиев, Қанат Ибраев, Мұрат Әмрин, Юлия Якупбаева, Серік Аманғалиев және Талғат Темірханов 50 миллион теңгеден аударды.

Қаражат "Ұлттық рух" қорына бағытталады.

Құрылтай депутаттары жеке қаражатынан 146 миллион 650 мың теңге жинады. Ал Respublica партиясы 100 миллион теңге бөлетінін хабарлады.

Қазақстан Халық Кеңесінің көмегі

Қазақстан Халық Кеңесінің бизнес өкілдері жалпы 815 миллион теңге көлемінде көмек көрсетуге ниет білдірді. Оның ішінде Allur Group және Integra Construction KZ өкілдері әр отбасыға 25 миллион теңгеден, SA Construction Group – 100 миллион, Karazhal Operating негізін қалаушы – 50 миллион теңге бөлмек. Өзге кәсіпкерлер де 1-10 миллион теңге аралығында қаржы аударуға уәде берді.

Халық Кеңесі хатшылығының мәліметінше, бұл қаражат қаза тапқан әскери қызметшілердің отбасыларына тікелей беріледі.

Компаниялар мен қорлардың көмегі

Barys Dynamic пен Beles құрылыс компаниялары 100 миллион теңге, "Харвест Групп" басшысы Алмаз Әлсенов 50 миллион теңге бөлетінін мәлімдеді.

Halyk қоры мен Болат Өтемұратовтың қоры марқұмдардың отбасыларына 25 миллион теңгеден береді. Сонымен қатар Halyk Bank қаза тапқан мерзімді әскери қызметкерлердің банк алдындағы берешегін толық кешіретінін хабарлады.

"ҚазМұнайГаз" марқұм әскери қызметкер Мадихан Азаматтың "Өзенмұнайсервис" қызметкері Болатбек Шалабаевтың ұлы екенін растады. Компания отбасыларға қажетті қолдау көрсететінін айтқанымен, нақты соманы жариялаған жоқ.

Air Astana мен FlyArystan қаза тапқан және аман қалған әскери қызметкерлердің жақын туыстарына, сондай-ақ оқиғадан аман қалған әскери қызметкерлерге 25 қыркүйек пен 3 қазан аралығындағы ішкі рейстерге тегін билет ұсынды.

Қосымша қаржының бір бөлігі қаза тапқан әскери қызметкерлердің отбасыларына көмек көрсету үшін "Ұлттық рух" қорына аударылады.