Антонимдер, омонимдер, синонимдер айырмашылығын білесіз бе? Тест шешіп көріңіз
Тілімізде антонимдер, омонимдер, синонимдер деген ұғымдар кездеседі. Бұл терминдер сізге таныс па? Әлде бұл терминдерді алғаш рет көріп тұрсыз ба? Бүгінгі материалда осы терминдерге кеңірек тоқталып, талдау жасаймыз. Содан соң төмендегі тестті шешіп, біліміңізді сынап көріңіз.
Антонимдер – мағыналары бір-біріне қарама-қарсы сөздер. Мысалы, арық – семіз, жуан – жіңішке, тату – араз, т.б.
Тілімізде антоним сөздер мақал-мәтелдерде, жұмбақтарда көп кездеседі.
Мысалы, Ащы мен тұщыны татқан білер, алыс пен жақынды жортқан білер. Аз сөз – алтын, көп сөз – көмір, т.б.
Осы мысалдардағы ащы-тұщы, алыс-жақын, аз-көп сөздері – мағыналары бір-біріне қарама-қарсы айтылған антоним сөздер.
Омонимдер – сыртқы тұлғасы: айтылуы, естілуі, жазылуы бірдей, мағыналары әртүрлі сөздер.
Мысалы, Ана жаққа қара, алыстан бір қара көрінді деген сөйлемдегі қара сөзі омоним, себебі бірінші қара сөзі – не істе? деген сұраққа жауап беретін, қимыл-әрекет атауы болатын етістік, екінші қара сөзі – кім? деген сұраққа жауап беретін зат есім.
Синонимдер – айтылуы, естілуі, жазылуы әр алуан, мағыналары бір-біріне жақын, жуық мәнді сөздер.
Мысалы, Менің анам сұлу, келбетті әйел деген сөйлемдегі сұлу, келбетті сөздері бірінің орнына бірін ауыстырып қолдануға болатын, мағыналары бір-біріне жақын, бір сөз табынан болған синоним сөздер.
Ережемен танысып, төмендегі тестті шешіп көріңіз. Іске сәт!