"Ауру бір жасқа толмаған балалардың арасында 0,7%-дан 2,8%-ға дейін, 14 жасқа дейінгі балалар арасында 0,4%-дан 15%-ға, 15-19 жастағылар арасында 0,8%-дан 5,2%-ға, 40-59 жастағы азаматтар арасында 1,5%-дан 24,7%-ға өскен", – деді Сағынтаев.

Оның сөзінше, балалар мен жасөспірімдерге жіті назар аударылып, олардың жаппай адам жиналатын орындарға баруын мүмкіндігінше шектеу қажет. Ересектер де сақтық шараларын ұмытпауы міндетті.

Сондай-ақ, сарапшылар коронавирусты симптоматикалық науқастар үлесінің артқанын айтады. Алдыңғы жеті күнмен салыстырғанда бұл көрсеткіш 1,5 есеге, яғни 46%-дан 73%-ға дейін өскен. Бұл COVID-19-дың ауыр клиникалық көріністерін тудыратын "дельта" штаммының таралуына байланысты, деді әкім.

"Жұмыспен қамту тұрғысынан алғанда, соңғы 14 күн ішінде өзін-өзі жұмыспен қамтығандар арасында коронавирустың таралуы жиі кездеседі (35%). Сондай-ақ, ауру жұқтырғандардың үлесі әртүрлі ЖШС , жеке кәсіпкерлер, АҚ қызметкерлері – 19%, зейнеткерлер – 17,4%, сондай-ақ мектеп оқушылары – 10,3% және мектеп жасына дейінгі балалар – 7%-ды құрайды", – деді қала басшысы.

Әкімдік мәліметінше, 1131 адам (80 бала) жұқпалы аурулар ауруханаларында жатыр, оның 33-інің жағдайы өте ауыр, 256 адам ауыр халде, 842-і орташа ауырлық дәрежесінде. Жасанды өкпе желдеткішіне – 19, инвазивті емес желдеткішке – 34, жоғары ағын құрылғысына 22 адам қосылған.

Талқылау