Алматы облысында "Қазпошта" кассирлері 84 миллион теңге ұрлады деген күдікке ілінді
Алматы облысында "Қазпошта" кассирлері 84 миллион теңгені жымқырды деген күдікке ілінді. Бұл туралы Stan.kz ақпарат агенттігі хабарлайды.
Қаржы мониторингі агенттігінің мәліметінше, мемлекеттік қызметтер көрсетілгені үшін жасалған төлемдерді аса ірі мөлшерде жымқыру мән-жайы бойынша сотқа дейінгі тергеп-тексеру басталды.
Тергеу нәтижесінде Алматы облысы Жамбыл ауданының халыққа қызмет көрсету бөлімінде жұмыс істейтін "Қазпошта" АҚ кассирлері 2021-2023 жылдары паспорт және жеке куәлік рәсімдеу барысында мемлекеттік баждың бір бөлігін иемденгені анықталды.
Көші-қон қызметіне баж соммасы жайлы көрінеу жалған ақпарат енгізілген түбіртекті ұсынып, мемлекетке 84 миллион теңгеден аса шығын келтірген. Тергеу жалғасып жатыр.
Қаржы мониторингі агенттігі экономикалық құқықбұзушылықтар үшін заңмен жауапкершілік көзделгенін ескертті.
Айта кетейік, бұған дейін "Қазпоштада" ақша жымқыру, алаяқтық, ұрлық және пара алу фактілері анықталғаны туралы жазған едік. Компанияға келтірілген шығын көлемі 273 миллион теңгеден астам болған.