"6-8 ай бұрын сатып алу керек": FlyArystan билеттердің қымбаттығын сынаған депутатқа жауап берді

Қазақстандық лоукостер FlyArystan әуе компаниясы депутаттың әуе билеттерінің қымбаттығына қатысты сынынан кейін мәлімдеме жасады. Бұл туралы Stan.kz ақпарат агенттігі хабарлайды.

Мәжіліс депутаты Ержан Бейсенбаев FlyArystan компаниясының баға саясатын сынға алды. Оның пікірінше, қазақстандық лоукостер билеттерді AirAstana мен басқа компаниялармен бірдей бағада сатады, дегенмен бастапқыда FlyArystan билеттері 10 мың теңгеден аспайды деп болжанған.

"Әуе компаниясы іске қосылғаннан кейін 2019 жылдың көктем-жаз маусымына ең төменгі тарифтегі билеттер ұшу күнінен 2-4 апта бұрын сатылатын. 4 жылдан кейін статистика күрт өзгерді және қазір барлық бағыттарға арзан билеттерді алдын ала сатып алу мерзімі 6-8 айды құрайды. Сондықтан жолаушылар орындардың көп бөлігін осы жаз айларына жылдың басында сатып алып қойған.

Айта кетейік, 2019 жылдан бастап билеттің ең төменгі бағасы өзгерген жоқ, тек жолаушылардың ьилет сатып алу дағдысы өзгерді: олардың саны көбейіп, сапарларын ертерек жоспарлай бастады", – делінген компания мәлімдемесінде.