2027 жылы ел бюджеті қайда жұмсалатыны белгілі болды

 

Қазақстан 2027 жылы республикалық бюджет шығыстарының 35 %-ын адам капиталын дамытуға бағыттауды жоспарлап отыр. Бұл туралы Stan.kz хабарлайды.

Қаржы министрі Мәди Такиев Құрылтайдың пленарлық отырысында келер жылғы республикалық бюджет шығыстарының 15 триллион теңгесі адам капиталына жұмсалатынын мәлімдеді.  

Оқыңыз

Мұнайдың арзандауынан Қазақстан бюджеті қанша қаржыдан қағылады Оқыңыз

Министр депутаттарға 2027–2029 жылдарға арналған республикалық бюджет туралы заң жобасын таныстырды. Оның айтуынша, 2027 жылы бюджет кірісі 25,4 триллион теңге, шығысы 30,2 триллион теңге болады деп болжанған. Бюджет тапшылығы 4,6 триллион теңгені немесе жалпы ішкі өнімнің 2,3 %-ын құрайды.

"2027 жылдың үш негізгі көрсеткіші: кірістер – 25,4 триллион теңге, шығыстар – 30,2 триллион теңге, тапшылық – 4,6 триллион теңге немесе жалпы ішкі өнімнің 2,3 %-ы. Мемлекеттің меншікті кіріс базасы нығайып келеді. 2029 жылға қарай меншікті кірістер 23,4 триллион теңгеге дейін өседі", – деді Мәди Такиев.

Қаржы министрінің мәліметінше, 2027 жылы әлеуметтік көмек пен әлеуметтік қамсыздандыруға 6,9 триллион теңге бөлу жоспарланған. Бұл бағытта атаулы көмек көрсету тәсілі сақталады.

Денсаулық сақтау саласына 2,5 триллион теңге қарастырылған. Қаражат тегін медициналық көмектің кепілдік берілген көлемін қамтамасыз етуге, дәрі-дәрмекпен қамтуға және медициналық сақтандыруға бағытталады.

Ал білім беру мен ғылымды дамытуға 897 миллиард теңге бөлу көзделген.

Бюджет жобасында өңірлерді қолдау да маңызды бағыттардың бірі ретінде белгіленген. Бұл мақсатқа 7,4 триллион теңге немесе жалпы бюджет көлемінің 24,8 пайызы қарастырылған. Қаражат инфрақұрылымды дамытуға және өңірлерде қолайлы жағдай жасауға жұмсалмақ.

Бұдан бөлек, қауіпсіздік пен мемлекеттік басқаруға 4,9 триллион теңге, ал мемлекеттік борышқа қызмет көрсетуге 3,5 триллион теңге бөлу жоспарланып отыр. Бұл тиісінше жалпы бюджет көлемінің 16,3 және 12 пайызына тең.

Айта кетейік, бұған дейін Қазақстан Үкіметі 2027–2029 жылдарға арналған бюджет жобасында инфляцияның біртіндеп төмендеуін болжағаны туралы жазған едік.