130 мың тонна астық заңсыз Қазақстанның астығы ретінде экспортқа шығарылған

Қаржылық мониторинг агенттігінің Батыс Қазақстан облысы бойынша департаменті астықтың сұр импортына қатысты схеманың жолын кесті. Тергеу дерегінше, импортталған астық кейін Қазақстанда өндірілген өнім ретінде Орталық және Оңтүстік Азия елдеріне экспортталған. Бұл туралы Stan.kz ақпарат агенттігі хабарлайды.

Тергеу мәліметіне сәйкес, Қазақстан аумағы арқылы жалпы құны 11,2 миллиард теңге болатын шамамен 130 мың тонна астық экспортталған. Жеткізілімдер Өзбекстанға, Ауғанстанға және Тәжікстанға жүзеге асырылған.

Схеманы іске асыру үшін алдын ала жалған басшылардың атына коммерциялық ұйымдар тіркелген. Кейін бұл компаниялар мен отандық шаруа қожалықтары арасында астық сатып алуға қатысты жалған шарттар рәсімделген. Осылайша астыққа Қазақстанда өндірілген өнім түрі беріліп, оны тасымалдау кезінде жеңілдетілген тариф қолданылған.

Оқыңыз

Құны 37 миллиард теңге болатын бензин Қазақстаннан Қырғызстанға заңсыз шығарылған Оқыңыз

Атап айтқанда, астық экспортына қатысты схемада "Bakery Nan", "KazGrano", "Perfect Seed", "Weizen" және "Golden Grain Kazakhstan" ЖШС-лары пайдаланылған. 

“Транзиттік тарифтің төленбеуі салдарынан "ҚТЖ – Жүк тасымалы" ЖШС-не 1 миллиард теңгеден аса көлемінде залал келтірілген. Сонымен қатар күдіктілер салық берешегін мәжбүрлеп өндіріп алудан және кредиторлар алдындағы міндеттемелерін орындаудан жалтару үшін өздерінің бақылауындағы экспорттаушы компаниялардың шоттарынан үлестес ұйымдардың шоттарына ақша аударып, кейін банкроттық туралы талап арыздар берген. Салдарынан мемлекет мүддесіне 1,2 миллиард теңге көлемінде залал келген”, – делінген хабарламада.

Іс бойынша бес адам күдікті деп танылды. 

Сотқа дейінгі тергеп-тексеру аяқталды. Процеске қатысушылар қылмыстық іс материалдарымен танысуға кірісті.