Әл-Фараби даңғылында болған жол апатында қаза тапқан 20 жастағы Т.К-ның әкесі сотталушыны кешірмейтінін және оған қатаң жаза тағайындалуына қол жеткізу үшін бар күшін салатынын мәлімдеді. Бұл туралы Stan.kz ақпарат агенттігі Tengrinews.kz сайтына сілтеме жасап хабарлайды. 

Бұған дейін сотта үш марқұмның туыстары айыпталушыны кешіргендерін айтқан болатын. 8 маусым күні Т.К-ның анасы да талап-арызынан бас тартып, моральдық және материалдық шығын үшін өтемақы алғанын растаған әрі соттан айыпталушыға шартты жаза тағайындауды сұраған.

Алайда қыздың әкесі бұл ұстаныммен келіспейді. Марқұмның қыздың әкесі тоғыз жыл бұрын бұрынғы жұбайымен ажырасқанын, қызының тәрбиесімен өзі айналысқанын айтты.

"Бұл әйел менімен тоғыз жыл бұрын ажырасқан. Қызымды дүниеге келген күнінен бастап өзім өсірдім, киіндірдім, тәрбиеледім, оқыттым. Ол – менің тұңғышым. Мен жерлеу рәсімдері мен ас беру жұмыстарымен жүрген кезде, ол полицияға барып, өзін жәбірленуші ретінде танытып, сотқа дейін жетіп үлгерген", – деді ол.

Марқұмның әкесінің айтуынша, айыпталушы оның бұрынғы жұбайына қомақты қаржы төлеген. Сондай-ақ оған да ақша ұсынылғанын жеткізді.

"Айыпталушының анасы маған 10 миллион теңге ұсынды. Маған оның миллиондары керек емес, маған балам керек. Мен оны кешірген жоқпын және ешқашан кешірмеймін. Мен Тараздағы ата-анасының үйіне бардым. Оның әкесі менен көз жасын төгіп кешірім сұрады", – деді ол.

Қаза тапқан қыздың әкесі адвокаттар жалдап, кінәлі адамның барынша қатаң жаза алуына қол жеткізу үшін мемлекеттік органдарға жүгінуді жоспарлап отырғанын айтты.

Оқыңыз

Әл-Фараби даңғылындағы жол апаты: Жәбірленуші тарап адвокаттарынан бас тартқан Оқыңыз

Үшінші жәбірленуші де сотталушыға кешірім берді

Жол апатында қаза тапқан жолаушының анасы, яғни үшінші жәбірленуші де сотталушыға қатысты шағымынан бас тартты. Ол сотталушыға бас бостандығынан айырудан басқа жаза тағайындауды сұрады. 

Қаза тапқан жолаушының анасы 21 наурыз күні таңғы сағат 9-да қызының қазасы туралы естіген. Содан кейін ол мәйітханаға мәйітті тануға барған. Оның айтуынша, қазір сотталушыға ешқандай талабы жоқ. Бәрінің заңға сәйкес болуын сұрап, соттың кез келген шешімімен келісетінін жеткізді.

Сондай-ақ сотталушының адвокаты сотқа жәбірленушінің арызын ұсынды. Онда ол айыпталушыға қатысты моральдық және материалдық талаптарының жоқ екенін, татуласу ерікті түрде жасалғанын көрсеткен. Ол соттан бас бостандығынан айырумен байланысты емес жаза тағайындауды сұраған.

"Мен оны кешіремін және оған ешқандай талабым жоқ, болашақта да болмайды. Сот қалай шешсе, солай болады", – деді қаза тапқан қыздың анасы сот отырысында.

Сонымен қатар сотқа жол апатында қаза тапқан басқа да жәбірленуші отбасылардың ұқсас өтініштері ұсынылды.

Жол апаты туралы толығырақ

21 наурыз күні Алматыдағы Әл-Фараби даңғылы мен Меңдіқұлов көшесінің қиылысында жантүршігерлік жол апаты болды. Салдарынан үш адам қаза тапты.

Zeekr маркалы автокөліктің жүргізушісі батыс бағытта келе жатып қарсы жолаққа шығып, жолдағы қарсы бағыттағы Mercedes көлігімен соқтығысқан. Апат салдарынан 29 жастағы Mercedes жүргізушісі мен 20 және 23 жастағы екі жолаушы оқиға орнында көз жұмды. Zeekr көлігінің жүргізушісі әртүрлі жарақаттармен ауруханаға жеткізілді.

Айта кетейік, мәжіліс депутаты Мұрат Әбенов Әл-Фараби даңғылында үш адамның өмірін қиған жол апатына Алматы полиция департаментінің жоғары лауазымды қызметкерінің қатысы болуы ықтимал деп санайды.

26 наурыз күні депутат өзінің әлеуметтік желідегі парақшасында жазба жариялады. Ол жариялаған видеода ер адам жарысқа полиция департаментінің бір бөлімше бастығының орынбасары өз қызметтік көлігімен қатысқанын айтқан.

Бейресми мәліметтерге сенсек, ішкі істер органдарының қызметкері, полиция департаменті басшысының орынбасары Ержан Ұзабаевтың қатысы болуы мүмкін. Алайда полиция бұл ақпаратты растамады, бірақ жоққа да шығармады.

Артынша, жол апатына байланысты полиция департаментінің бірнеше басшысы қызметінен босатылды.

Бұл туралы ішкі істер министрі Ержан Саденов хабарлады. Министр жол апатында қаза тапқандардың отбасылары мен жақындарына көңіл айтты.

Ішкі істер министрлігінің ресми өкілі Шыңғыс Алекешев министрдің бұйрығымен Алматы қаласы полиция департаменті бастығының сыртқы қызметтер мен жол қауіпсіздігін қадағалайтын орынбасары, сондай-ақ әкімшілік полиция және қоғамдық қауіпсіздік басқармаларының басшылары қызметтерінен босатылғанын мәлімдеді.