Заңсыз иемденген 40 миллиард теңге мен Астанадағы бизнес-орталық мемлекетке қайтарылды

Бүгін Қазақстан Республикасының премьер-министрі Олжас Бектеновтің төрағалығымен Заңсыз иемденілген активтерді мемлекетке қайтару жөніндегі комиссияның кезекті отырысы өтті. Бұл туралы Stan.kz ақпарат агенттігі хабарлайды. 
 Фото: primeminister.kz

Комиссия жалпы көлемі 40 млрд теңгеден астам сомаға заңсыз иемденілген активтерді мемлекетке ерікті түрде қайтару жөніндегі келісімдерді мақұлдады. Оның 38 млрд теңгеден астамы – ақшалай қаражат болса, 2 млрд теңгесі – Астанадағы бизнес-орталық.

“Қайтарылған қаражат әлеуметтік мақсаттарға, оның ішінде су тасқыны салдарын жоюға бағытталады. Бұған қоса 7 млрд теңге сомасына инвестициялық келісімдерге қол қою мақұлданды. Оның аясында "Заңсыз иемденілген активтерді мемлекетке қайтару туралы" заң қолданылатын тұлғалар Астана және Шымкент қалаларында екі инфрақұрылым нысанын салады”, – делінген үкімет хабарламасында.

Аталған жобаларды іске асыру жұмыс орындарын құруға мүмкіндік береді және қосымша салық түсімдерін қамтамасыз етеді.

"Активтерді қайтару – мемлекет басшысының әлеуметтік әділеттілікті қалпына келтіру жөніндегі саясатының тікелей іске асырылуы. Барлық қайтарылған қаражат Қазақстан халқының игілігіне жұмсалады", — деп атап өтті Олжас Бектенов.

Атай кетейік, бұған дейін Қайрат Сатыбалдының заңсыз иеленген мүлкі өз еркімен мемлекетке қайтарылған еді.