Ұлттық банк төрағасы қазақстандықтарға доллар сатып алудың орнына ақшасын теңгемен депозитте сақтауға немесе жылжымайтын мүлік сатып алуға кеңес берді. Ол бұл туралы базалық мөлшерлемені көтеру мәселесіне арналған брифинг барысында айтты.

"Қазір доллар жинақ құралы болмауы қажет, өйткені теңгелік құралдар жақсы кіріс береді. Бүгін біз базалық мөлшерлемені көтеру туралы шешім қабылдадық. Бұл тиісінше жеке тұлғалар үшін депозит мөлшерлемелерін арттыруы мүмкін. Ақшасын банкке депозитке салғысы келетін қарапайым қазақстандықтар үшін депозит кірісі де артады. Сондықтан асығыс әрекет жасамауды ұсынар едім", – деді Сүлейменов.

Доллар бағамы 600-ге жете ме – Ұлттық банк төрағасы жауап берді
Ұлттық банк валюта интервенциясына 1 миллиард доллар жұмсады

Сүлейменов доллар сатып алудан гөрі теңгелік депозит үлкен табыс әкелетінін айтты. Оның пікірінше, қазақстандықтар өздерінің экономикалық жүйесінде қалуы керек.

"Депозит нарығы бар, халықтық IPO бар. Көпшілік сияқты жылжымайтын мүлікке инвестиция сала аласыздар. Яғни, Қазақстанда бар, өзіміз жақсы түсінетін құралдарды таңдаңыздар, доллар секілді емес олар біздің бақылуымызда. Ертең жаңа сайланған АҚШ президенті Дональд Трамп басқа экономикалық шараларды қабылдап, доллар құлдырап кетуі мүмкін", – дейді Ұлттық банк төрағасы.

Еске салсақ, бұған дейін Ұлттық банк базалық мөлшерлемені 15,25%-ға көтерген еді.

Талқылау