Астананың мамандандырылған ауданаралық әкімшілік соты Оңтүстік Кореяда көз жұмған Қазақстан азаматының мәйітін жеткізу шығынын сыртқы істер министрлігіне жабуға мәжбүрлеу туралы істі қарады. Бұл туралы Астана ауданаралық мамандандырылған соттың судьясы Жанар Дүйсенова Facebook парақшасында хабарлады.

Судьяның айтуынша, қазақстандық әйел 23 жастағы ұлының қатерлі ісігін емдетуге Оңтүстік Кореяға кеткен. Алайда жігіт сол елде көз жұмған. Анасы мәйітті отанына жеткізуге қаржылай көмек сұрап, Қазақстанның Кореядағы елшілігіне хабарласқан.

Алайда олардың ақша аударғанын күтпей, әйел қарыз алып, қайырымдылық көмек арқылы барлық шығынды өзі көтеріпті. Сыртқы істер министрлігі мұны мемлекеттік көмектен бас тарту деп бағалап, әкімшілік рәсімді тоқтатқан.

Сол үшін әйел сотқа жүгінді. Себебі ол қарыздарын министрліктің қаржысымен жабамын деп ойлаған екен.

Қазақстан заңнамасына сәйкес, азамат шетелде көз жұмған жағдайда консулдық оның жерлеуін қамтамасыз етуге немесе мәйітті отанына жеткізуді ұйымдастыруға міндетті (ҚР Консулдық жарғысының 84-бабы).

"Сот қазақстандық дипломаттар марқұмның жерлеу немесе мәйітін жіберу шараларын қолдануға міндетті деп санады. "Шетелде Қазақстан Республикасының мүддесін қорғау" бағдарламасы азаматтарға багажды жөнелту, 200 жүкті рәсімдеу, денені бальзамдау және мәйітханада сақтау шығындарын төлей отырып, азаматтарға материалдық көмек көрсетуі керек”, – деді Дүйсенова.

Әйел жерлеу рәсімін өзі төлесе де, мемлекет шетелде қиын жағдайға тап болған азаматтарына материалдық көмек көрсету міндетінен босатылмайды.

Сотта консул әйелге ұлының қаза болғаны туралы куәлік беріп, материалдық көмек көрсету үшін қажет шаралар жасалмағаны атап өтілді. Сыртқы істер министрлігі әкімшілік рәсімді қайта жүргізіп, талапкердің пайдасына шешім қабылдауға міндетті.

Сот шешімі заңды күшіне енді.

Талқылау