Венада музейден бұрын Мысыр патшайымы таққан бағалы алқа ұрланды

Венада күндіз екі ұры музейдегі әйнек витринаны сындырып, құрамында 600-ден астам гауһары бар бағалы алқаны алып кеткен. Құны 4 миллион доллардан асатын зергерлік бұйым кезінде Мысыр корольдік әулетіне тиесілі болған. Бұл туралы Stan.kz ақпарат агенттігі bbc.com порталына сілтеме жасап хабарлайды.

Венада күндіз екі ер адам музейден 600-ден астам гауһар таспен көмкерілген бағалы алқаны ұрлап кеткен. Қазір полиция күдіктілерді іздестіру бойынша халықаралық операция жүргізіп жатыр.

Полиция мәліметінше, бейсенбі күні түстен кейін екі күдікті Вена қолданбалы өнер музейіндегі әйнек витринаны сындырып, платинадан жасалған алқаны алып кеткен. Оның құны 4 миллион доллардан (1 миллиард 856 миллион теңге) асады деп болжанып жатыр.

Алқа бір кездері Мысырдың бұрынғы корольдік әулеті үшін арнайы жасалған. Ол зергерлік бұйымдар шығаратын Van Cleef & Arpels компаниясының музейде қыркүйекке дейін жалғасатын көрмесіне қойылған еді. Вена полициясы бейнебақылау камераларына түсіп қалған екі күдіктінің маскасыз фотосуреттерін жариялады. Құқық қорғау органдары қылмыс туралы қандай да бір ақпарат білетін азаматтарды полицияға хабарласуға шақырды. Тергеу мәліметінше, күдіктілердің бірінде атыс қаруы болған.

Алқаны иемденгеннен кейін ұрылар музейдің оңтүстігінде орналасқан Вена қалалық саябағы бағытына қарай қашып кеткен.

MAK бас директоры Лилли Холлейн аса құнды зергерлік бұйымның ұрлануы музей қызметкерлерін қатты күйзелткенін айтты. Оның сөзінше, көрме қарсаңында музей Van Cleef & Arpels компаниясымен бірлесіп қауіпсіздік жоспарын әзірлеген және барлық қажетті шара мұқият дайындалған.

Оқыңыз

Микеланджело салған аяқтың суреті аукционда 23 миллион долларға сатылды Оқыңыз

Музей басшысы қарулы оқиға кезінде қызметкерлер сабыр сақтап, белгіленген тәртіп бойынша әрекет еткенін атап өтті. Оқиға салдарынан ешкім зардап шекпеген.

Ұрлық Еуропадағы музейлерде болған соңғы бірқатар ірі қылмыстардан кейін орын алып отыр. Бейсенбі күні Испаниядағы музейлердің бірінен тарихқа дейінгі дәуірге тиесілі бағалы әшекейлер мен жәдігерлер коллекциясы ұрланған. Ал осы айдың басында Сицилиядағы музейден Қайта өрлеу дәуіріне тиесілі төрт картина жоғалған. Жыл басында Пармадағы музейден Ренуар, Сезанн және Матисс шығармалары ұрланған. Бұған дейін Париждегі Лувр музейінде де ірі ұрлық болған. Былтыр қазан айында бетперде киген қылмыскерлер музейден баға жетпес зергерлік бұйымдарды алып кеткен.

Бірқатар ұрлық Еуропадағы мәдени нысандардың қауіпсіздігіне қатысты сұрақтар туғызды. Europol музейлердегі ұрлықтардың барған сайын агрессивті сипат алып, күш қолдану әдістеріне ауысып жатқанын мәлімдеді. Ұйым мұны жаңа қылмыстық желілердің іске араласуымен байланысты болуы мүмкін екенін айтты. Венада ұрланған алқа Мысырдың бұрынғы корольдік әулеті үшін жасалған. Оны 1939 жылы Мысыр патшайымы Назли қызы Фавзияның Иранның болашақ шахы Мұхаммед Реза Пехлевиге үйлену тойында таққан.

Van Cleef & Arpels бұл әшекейді "ақ зергерлік өнердің салтанаты" деп сипаттайды. Алқадағы гауһар тастардың жалпы салмағы 200 караттан асады. Осыдан он жыл бұрын алқа аукционға шығарылған кезде оның бағасы 3,6-4,6 миллион доллар (1 миллиард 670,4 миллион теңге-2 миллиард 134,4 миллион теңге) аралығында бағаланған.

Қазір Вена мен Төменгі Австрия аумағында полицияның кинологиялық бөлімдері жұмылдырылып, мамандар заттай дәлелдер мен бейнебақылау жазбаларын зерттеп жатыр. Оқиғадан кейін музейдегі көрме қайта ашылды.

Еске салайық, бұған дейін Парижде Лувр мұражайынан бағалы зергерлік бұйымдар ұрланғанын жазған едік. Франция президенті Эмманюэль Макрон бұл оқиғаға байланысты пікір білдіріп, ұрланған жәдігерлердің міндетті түрде қайтарылып, кінәлілердің жауапқа тартылатынын айтты. Ал осыдан бұрын Павел Дуров Луврдан ұрланған зергерлік бұйымдарды сатып алуға дайын екенін мәлімдеген еді.