Түркістан облысының бірнеше ауылын су басты (видео)
Түркістан облысында тасқын су Сарыағаш ауданының Бағыс ауылын да шайып кеткен. Бұл туралы өңірдің Төтенше жағдайлар департаменті мәлімдеді, деп хабарлайды Stan.kz ақпарат агенттігі.
Жақында қатты жауын салдарынан Қазығұрт ауданының 4 елді мекенін су шайып кеткен болатын. Топан су Сарыағаш ауданының Бағыс ауылында 53 үйдің ауласына, 18 үйдің, 1 тойхананың, 16 шаруашылық құрылыстың ішіне су кіргені анықталған.
Су басқан аумақтардан 50 адам эвакуацияланды. Сондай-ақ қырылған үй жануарларының саны анықталуда. Қазір бұл аумақтарда жергілікті атқарушы және төтенше жағдай бөлімінің қызметкерлері тарапынан аумақтан су сорып шығару жұмыстары жүргізіліп жатыр.
"Аудандық өрт сөндіру бөлімі мен бекеттерінің, жергілікті ауыл әкімдіктердің ұйымдастыруымен су сорғыштар көшелер мен үйдің аулаларына толған суды шығару жұмыстарымен айналысуда. Жұмысқа Төтенше жағдайлар департаментінің 56 қызметкері, 9 бірлік техника, 11 мотопомпа және жергілікті атқарушы органдардың 19 қызметкер, 6 бірлік техника, 2 мотопомпа күштерімен суды сору және арықтарды тазалау жұмыстары жүргізілуде. Сонымен қатар көшелерді, үйлердің аулаларын су басу фактісіне байланысты аудан әкімдігінің жедел желісі іске қосылып, тұрғындар тарапынан хабарламалар түскен жағдайда шұғыл іс-шаралар атқарылуда", - делінген облыстық ТЖД баспасөз қызметінің хабарламасында.