Түркістан облысында жалған ақпарат таратқандар 10 жылға сотталуы мүмкін
Түркістан облысында коронавирус туралы жалған ақпарат таратқан адамдарға қатысты тергеу жүріп жатыр, деп хабарлайды Stan.kz ақпарат агенттігі.
Өңірлік коммуникациялар қызметінде өткен брифингте облыстық полиция департаментінің бірінші орынбасары Әбдіғани Сейдуалиев 3 күдіктінің қалай жазалатынын айтты.
Олар коронавирусқа байланысты жүріп жатқан оқу-жаттығу жұмыстарын ұялы телефонға түсіріп, сол өңірлерде оба тарап жатыр деген мағынада бейнематериалдарды әлеуметтік желілерде таратқан.
Бұл ретте, полицейлер жалған ақпарат таратқан азаматтар ҚР Қылмыстық кодескіне сәйкес жауапкершілікке тартылатынын атап өтті.
""Қылмыстық кодекстің 274-ші бабы "Көрінеу жалған ақпарат тарату" деп аталады және оның санкциясында 10 жылға дейін бас бостандығынан айыру жазасы көрсетілген. Мәселен, облыста Мақтаарал, Шардара аудандары мен Кентау қаласында 3 дерек тіркелді", - деді Әбдіғани Сейдуалиев.
Бұған дейін Қазақстанда коронавирус жұқтырғандардың саны 33-ке жеткені хабарланды. Олардың 15-і Алматыда, қалған 18 науқас елордада тіркеліп отыр.