Президент ауқатты қазақстандықтарға салықты көбейтуді ұсынды

Президент Қасым-Жомарт Тоқаев Қазақстан халқына Жолдауында ірі байлық иелеріне жоғары мөлшерлемемен салық салу мәселесін талқылауды ұсынды. Сонымен қатар ол жаңа Салық кодексіндегі кәсіпкерлерге қиындық туғызып отырған талаптарды қайта қарау қажеттігін айтты. Бұл туралы Stan.kz ақпарат агенттігі хабарлайды.

Мемлекет басшысының айтуынша, жаңа Салық кодексі салық жүйесін түбегейлі өзгертуге негіз болды. Алайда реформаны жүзеге асыру барысында кейбір заң талаптарын қолдану қиындық туғызып, кәсіпкерлердің жұмысына кедергі келтіріп отыр.

"Салық кодексі – өзгертуге болмайтын қасиетті кітап емес. Ол шынайы өмірден алшақ болмауы керек. Сондықтан заңдағы қайшылықтарды жойып, талаптарды әртүрлі түсіндіруге жол бермеу қажет. Кәсіпкерлерге түсетін артық жүктемені азайту керек. Салық жүйесі бизнестің дамуына, инвестиция тартуға және жаңа жұмыс орындарын ашуға кедергі келтірмеуге тиіс", – деді Тоқаев.

Президент Үкіметке кәсіпкерлердің пікірін ескеріп, салық заңнамасына нақты түзетулер әзірлеуді тапсырды. Оның айтуынша, өзгерістер мұқият ойластырылуы керек. Өйткені заң талаптарының жиі ауысуы кәсіпкерлерге тұрақты жұмыс істеуге мүмкіндік бермейді.

Оқыңыз

Жаһандық ашаршылық болса, Еуразия азық-түлікпен қамтамасыз ететін негізгі орталық болуы әбден ықтимал – Тоқаев Оқыңыз

Ауқатты азаматтарға салық мөлшерін арттыру жайлы

Сонымен қатар мемлекет басшысы салық салудағы әділдік мәселесін көтерді. Ол ірі байлыққа ие азаматтар үшін жоғары салық мөлшерлемесін енгізуді талқылайтын уақыт келгенін мәлімдеді.

"Менің ойымша, ірі байлық иелеріне жоғары салық мөлшерлемесін енгізу мәселесін талқылайтын уақыт келді. Атап өткім келеді, ешкім заңды жолмен алынған активтерге қандай да бір шектеу қоюды көздеп отырған жоқ. Бұл Конституцияға қайшы болар еді. Әңгіме әр азаматтың еліміздің дамуына өз мүмкіндігіне сай әділ үлес қосуы туралы болып отыр. Бұл – әділдік мәселесі", – деді президент.

Тоқаев Үкімет пен Құрылтайға осы мәселені жан-жақты зерттеп, тиісті ұсыныстар әзірлеуді тапсырды. Әзірге жоғары салықтың нақты мөлшерлемесі мен оның кімдерге қолданылатыны белгіленген жоқ.

Бұдан бөлек, президент салық жүйесін толық цифрландыру қажеттігін айтты. Оның сөзінше, жасанды интеллект пен заманауи технологиялар салық жинауды жақсартуға, көлеңкелі экономиканы қысқартуға және жемқорлық тәуекелдерін азайтуға мүмкіндік береді.

Еске салсақ, бұған дейін Тоқаев инфляция деңгейі әлі де жоғары екенін айтып, Үкімет пен Ұлттық банкке бағаның өсуін тежеуді тапсырған еді.