Фото: akorda.kz
Ақорданың мәліметінше, Қасым-Жомарт Тоқаев министр Шыңғыс Әріновтің есебін тыңдап, министрліктің атқарған жұмысы мен жүргізілген реформалары туралы ақпарат алған.
Шыңғыс Әрінов құтқарушылардың жаңа киім үлгісі бекітілгенін, материалдық-техникалық базаны жаңғырту жұмыстары жалғасып жатқанын, әуе кемелері сатып алынғанын жеткізді. Елді мекендердегі қауіпсіздікті қамтамасыз ету үшін "Ауыл құтқарушылары" бағдарламасы қолға алынғанын да атап өтті.
Сонымен қатар президентке еліміздегі су тасқыны жөнінде ақпарат берілді. Министрдің айтуынша, республика аумағындағы жағдай тұрақты. Қауіп төнген жағдайда тұрғындарды эвакуациялау үшін күштер мен техникалар дайын. Сегіз өңірдегі жағдай бақылауда. Ресей және Қырғызстанмен тұрақты түрде ақпарат алмасу жұмыстары жүргізілуде.
“Президент су тасқынына қарсы шараларға баса назар аудару, алдын ала ескерту жүйесін жаңғырту және төтенше жағдайдың салдарын жою бойынша бұған дейін берілген тапсырмалардың орындалуын жалғастыру жөнінде міндет жүктеді”, – делінген хабарламада.
Еске салсақ, бұған дейін Ақмола облысында су тасқынына байланысты мектепте сабақ тоқтатылып, оқушылар үйіне қайтарылған еді.