Тоқаев: Медициналық мекемелер коронавирустың екінші толқынына дайын емес
Қасым-Жомарт Тоқаев дәрі-дәрмектермен қамтамасыз ету мәселесі туралы айтып берді, деп хабарлайды Stan.kz ақпарат агенттігі.
Тоқаев ПТР сынамалары мен медициналық бетперделердің бағасы төмендетілгенін атап өтті. Мұндай оң бастаманы халық бірден сезінді. Осындай жұмыстарды медициналық дәрі-дәрмектерге, ең алдымен, коронавирусқа қарсы медикаменттерге қатысты жүргізу қажет екенін жеткізді мемлекет басшысы.
"Медициналық ұйымдарға жүргізілген бағалау қорытындысы олардың дайындық деңгейінің әлі де төмен екенін көрсетті. Денсаулық сақтау нысандарының жартысынан астамында заң бұзушылықтар анықталған. Ауруханалар аймақтарға толық бөлінбеген. Нәтижесінде емделушілер мен аурухана қызметкерлерінің індет жұқтыру қаупі сақталып отыр. Шын мәнінде,х барлық өңірлерде жан сақтау бөлімшелерінің тиісті құрал-жабдықтармен толыққанды қамтамасыз етілмегені көрінді. Атап айтқанда, коронавирус індетімен қатты ауырған науқастарды емдеуге қажетті жекелеген дәрі-дәрмектер мен медициналық бұйымдардың жетіспеушілігі байқалады", - дейді Тоқаев.
Өңірлер емдеу хаттамасында көрсетілген дәрі-дәрмектерді емес, өздерінің білгені бойынша препараттар сатып алып жатқанын қосты ол.