AAPL
140.52 $
0.11 %
TSLA
658.8 $
4.88 %
NDAQ
147.5 $
0.59 %
GOOGL
2116.1 $
-0.16 %
FRHC
40.13 $
0.96 %
AAPL
140.52 $
0.11 %
TSLA
658.8 $
4.88 %
NDAQ
147.5 $
0.59 %
GOOGL
2116.1 $
-0.16 %
FRHC
40.13 $
0.96 %
Соңғы жаңалықтар
Соңғы жаңалықтар

"Тәрбиеші ұрсын деген": Балабақшада қатарластары соққыға жыққан баланың әкесі оқиға туралы айтты

Алматыда балабақшада қатарластарынан таяқ жеген баланың әкесі барлық мән-жайды өз аузымен айтып берді, деп хабарлайды Stan.kz ақпарат агенттігі “КТК” арнасына сілтеме жасап. 

Баласын сабап жатқанын көріп жыларман болған әкесі бір топ баланы тәрбиеші "арандатқан" деп топшылайды.

Өйткені қуып жүріп ұрған ұл-қыздардың өзі түгел тәптіштеп тұрып жайып салған. Қазір осы келеңсіз жайтқа жол берген №58 балабақшаның меңгерушісі мен тәрбиешісі жұмысынан босатылды. Ал төрт жастағы Абылай психологтың көмегіне зәру. Тілшіміз зардап шеккен баланың әкесімен тілдесіп келген еді.  

Амангелді Әскенов балабақшада қатарластарынан оңбай таяқ жеген баланың әкесі. Ол тұңғышы көкала қойдай болып үйге келгенде бірден мектепке дейінгі мекемеге барып бейнебақылау камерасын көтерткен. Ең сорақысы, балалардың бірі қалмай ұлын қуып жүріп ұрғанын балабақша ұжымы біле тұра, ешкімге тіс жармауға тырысты дейді жігіт ағасы.

“Балам шошып қалған. Бұл оқиғаны көзге жас алмай айта алмайсың. Көрген адамның өзі жылайды. Мұғалімі бірден айтуы керек еді. Тәрбиешісі көре сала бізге хабарласуы керек еді. Ол телефонын шұқылап отыра берді. Балабақшаның бәрі сондай шу болғанын біледі. Апайдың өзі балаларды үйіне жіберіп жатқанмын дейді. Оның бәрі өтірік. Негізінде ол жиналыста отырған адам. Балаларды тастап кеткен”, – дейді Амангелді Әскенов.



Амангелді кішкентай балаларды ондай қатігездікке ешқандай ата-ана үйретпейтініне сенімді. Сондықтан ол ұл-қыздарды тәрбиеші "арандатқан" деп топшылайды. Бұл болжамды жабылып кеткен топтағы бүлдіршіндер де растапты.

“Балалардың бір-екеуінен сұрадық. Мұғалімдер сол жерде болды. Қандай себеп болды деп сұрадық. "Бізге апай Абылай тұрса ұрыңдар" деп айтты.  Кішкентай бала бәрін сіңіріп алады, айтқанды істейді. Бала дұрыс тәрбие көрмеді дегеннің өзінде, барлығы жабылып, ойлары бір жерден шыға қоймас. Мен балаларды кінәлай алмаймын. Себебі, баладан мен ондай күтпеймін. Ата-анадан да күтпеймін. "Барып жабылып ұрыңдар" деп ешқандай ата-ана айтпакйды деп ойлаймын”, – дейді баланың әкесі. 

Күні кеше әлеуметтік желіге таралып кеткен видеодан жалғыз баланы ұлы да, қызы да жабылып аяусыз төпелеп жүргенін байқауға болады. Соққылардан бала арлы-берлі қашып, бір кезде жерге құлайды. Соның өзінде бірі басынан, екіншісі ішінен теуіп жатыр. Бұл бөлмеде не тәрбиеші, не бала күтуші көрінбейді. Осы жайттан зардап шеккен төрт жастағы Абылай қазір психологтың көмегіне зәру дейді жыларман болған әкесі.

“Бала шошынып қалған. Қорқады. Балабақшаға барғысы келмейді. Психологтармен жұмыс істеу керек енді. Психологты олар беру керек. Олардың міндеті деп санаймын. Себебі, білім басқармасының кесірінен бала сондайға ұшырап отыр. Жауапты адам болу керек. Мен қайдан білемін, балам дұрыс бола ма, болмайтынын. Бұндайға дейін барады. Басымыздан осындай жағдай өтеді деп үш ұйықтасам түсіме кірмеген”, – дейді Амангелді Әскенов.

Көпшіліктің талқысына түскен бейнекадрлерден кейін білім басқармасы қызметтік тексеріс жүргізіп, №58 мемлекеттік балабақшаның меңгерушісі мен балаларды қараусыз қалдырып кеткен тәрбиеші жұмысынан босатылды. Сондай-ақ мектепке дейінгі тәрбие және оқыту бөлімінің және Әуезов ауданының білім бөлімі басшысына тәртіптік жаза қолданылған.

Бірақ "ұлымның жүйкесі зақымданды" деп шыр-пыр болған Амангелді Әскенов полицияға арыз жазған. Ол кінәлілер заң алдында жауап бермейінше, соңына дейін күресемін деп отыр.

Еске салсақ, осыған дейін әлеуметтік желіде балалардың өзге баланы ұрып жатқан видеосы тараған болатын. Оқиға Алматыдағы Әуезов ауданының №58 балабақшасында болған. Әкімдіктегілер оқиғаның мән-жайын айтып берді

Талқылау
Пікір
Қазір оқып жатыр
Қазір оқып жатыр