ШҚО-ның полиция бөлімшесіндегі күдіктінің өлімі: Үш тәртіп сақшысы қамауға алынды
ШҚО-дағы полиция бөлімшесінде күдіктінің өлімі туралы іс бойынша ішкі істер органдарының үш қызметкері ұсталды, деп хабарлайды Stan.kz ақпарат агенттігі Шығыс Қазақстан облысы полиция департаментінің баспасөз қызметіне сілтеме жасап.
ШҚО полиция департаментінің бастығы Сағат Мәдиевтің басшылығымен құрылған жедел-тергеу тобы Мақаншы ауылына барды. Процессуалдық прокурорлармен бірге ол полиция бөлімінде 33 жастағы ер адамның өлімін тексеріп жатыр.
"Барлық жағдайлар мұқият тексеріледі. Қажетті сараптамалар, оның ішінде патологоанатомиялық зерттеулер жүргізіледі, олардың нәтижелері әлі дайын емес. Кінәлі тұлғалар заңда белгіленген тәртіппен жауапкершілікке тартылады", - деді ШҚО полиция департаментінің бастығы.
Құқық қорғау органдарының мәліметінше, өзіндік қауіпсіздік басқармасы ішкі қызметтік тергеу жүргізді.
"Күдікті деп танылған үш адам тәртіптік комиссияның шешімімен ішкі істер органдарынан теріс себептермен шығарылды. Олар қылмыстық кодекстің 146-бабы (азаптау) бойынша сотқа дейінгі тергеп-тексеру шеңберінде Үржар аудандық полиция бөлімінің уақытша ұстау изоляторына қамалды.
Сонымен қатар, Шығыс Қазақстан облысы полиция департаменті бастығының бұйрығымен мемлекеттік қызметтің беделін түсіргені, "құқық қорғау қызметі туралы" заң талаптарын сақтамағаны, сондай-ақ қарамағындағылардың қызметі мен мінез-құлқын тиісінше бақыламағаны үшін Үржар аудандық полиция бөлімінің екі басшысы ішкі істер органдарынан шығарылды", - делінген хабарламада.
Полиция сотқа дейінгі тергеу жалғасып жатқанын және тергеу мүддесі үшін басқа ақпарат жария етілмейтінін хабарлады.
Еске салайық, Шығыс Қазақстан облысы, Үржар ауданы, Мақаншы ауылының полиция бөлімшесінде күдікті көз жұмды. Ол мал ұрлады деген айыппен полиция бөліміне шақырылған.