Қазақстанда оқушыларға сабақ кезінде телефон қолдануға тыйым салынады: Заң Тоқаевтың қол қоюына жіберілді
Депутаттар оқушыларға сабақ барысында телефон қолдануға тыйым салатын заңды мемлекет басшысына жолдады. Балалар телефонды мектепке алып келе алады, алайда сабақ кезінде қолдануға рұқсат жоқ. Бұл туралы Stan.kz ақпарат агенттігі хабарлайды.
Фото: pixabay.com
Аталмыш заң жетім балаларға тәлімгерлік институтын енгізуді, балалардың қауіпсіздігін қамтамасыз етуді және білім беру ұйымдарының басқару еркіндігін кеңейтуді көздейді.
Заңда орта білім беру ұйымдарында смартфондарды пайдалану ережелерін бекіту қарастырылған. Айта кетейік, бұған дейін мәжіліс депутаты Асхат Аймағамбетов бұл ереже тек сабақ кезіндегі шектеулерге қатысты екенін және бала ұялы телефонды мектепке әкеліп, үзіліс кезінде пайдалана алатынын түсіндірген еді.
Сонымен қатар білім саласына қатысты заңда бірінші сыныпқа тестілеусіз қабылдау, балабақшаларға орын беру бойынша бірыңғай кезекті қамтамасыз ету, білім беру ұйымдарында зорлық-зомбылықты насихаттайтын, діни сипаттағы ақпараттың таралуына жол бермеу және суицидке шақыруды болдырмау шараларын қабылдауды көздейтін нормалар ұсынылған.
Құжатқа сәйкес 30 жылдан астам уақыт пайдалануға берілген мектептер, балабақшалар мен колледждер ғимараттарының қаупін анықтау үшін олар әр бес жыл сайын тексеруден өтеді.
Сондай-ақ балалардың қауіпсіздігін қамтамасыз ету мақсатында терезе саңылауын қауіпсіздік құлпымен қамтамасыз ету туралы заңнамалық талаптар белгіленген. Жаңа заңнамалық талап енгізіліп жатыр. Оған сәйкес мектептер, балабақшалар мен ауруханалар салуды есепке алмай көпқабатты тұрғын үйлер салуға тыйым салынады.
Жаңа ықшамаудандарда көппәтерлі тұрғын үй салу кезінде, құрылыс жобалау құжаттарында әлеуметтік маңызы бар білім беру және денсаулық сақтау объектілерінің міндетті түрде болуын ескеру туралы нормалар енгізілген. Яғни, денсаулық сақтау және білім беру объектілерін орналастыру есепке алынбаса, онда бұл аумақта көппәтерлі тұрғын үйлерді салуға тыйым салынады.
Мұнымен қоса, арнайы білім беру ұйымдарындағы жетім балалардың, ата-анасының қамқорлығынсыз қалған балалардың өз бетінше өмір сүруге дайындалуына жеке қолдау мен көмектесуге бағытталған тәлімгерлік қызметін енгізу қаралып отыр. Аталған норманы қабылдау – балаларды толыққанды әлеуметтендіруге, психологиялық қолдауға және әлеуметтік қорғауға ықпал етеді.
Сенат депутаттары "Қазақстан Республикасының кейбір заңнамалық актілеріне білім беру, тәлімгерлік және балалардың қауіпсіздігі мәселелері бойынша өзгерістер мен толықтырулар енгізу туралы" заңды мақұлдап, Қасым-Жомарт Тоқаевқа қол қоюға жіберді.
Бұған дейін депутаттар сабақ үстінде оқушылардың телефон ұстауын шектейтін заңды қабылдаған еді.