Сән-салтанатты көрсетпеңіз: Қазақстандық шенеуніктердің желідегі жазбаларына қатысты ескерту жасалды

Қазақстанда мемлекеттік қызметкерлерге әлеуметтік желілер мен мессенджерлерді қолдану кезінде абай болу ескертілді. Себебі жеке парақшадағы бір жазба, фото немесе сторис қызметкердің өзіне ғана емес, ол жұмыс істейтін мемлекеттік органның беделіне де әсер етуі мүмкін. Бұл туралы Stan.kz ақпарат агенттігі хабарлайды.

“Жеке парақша”деп жазу жауапкершіліктен босатпайды

Мемлекеттік қызметкер аккаунтына “жеке парақша” немесе “жеке пікірім” деп белгі қойғанымен, бұл оны заң талаптары мен Әдеп кодексін сақтаудан босатпайды.

Жеке парақшадағы контент те мемлекеттік қызметке қойылатын шектеулерге қайшы келмеуі керек. Әсіресе мемлекеттік қызметтің беделіне нұқсан келтіретін, қорлайтын, былапыт, арандатушы немесе адамның ар-намысына тиетін жазбалар жариялауға болмайды.

Бірнеше секундта өшкен сторис те сақталып қалады

Әлеуметтік желідегі сторис 24 сағаттан кейін автоматты түрде өшкенімен, оны кез келген адам скриншот жасап немесе экранға жазып алып қалуы мүмкін. Сондықтан фото мен видео жарияламас бұрын оның кейін қайта таралуы ықтимал екенін ескерген жөн.

Қызметтік немесе көпшілікке таратуға арналмаған ақпаратты әлеуметтік желіде бөлісуге де жол берілмейді.

Оқыңыз

Қазақстанда шенеуніктер туыстары мен қосымша табысы туралы мәлімет беруге міндеттеледі Оқыңыз

Сән-салтанатты көрсету де сұрақ туғызуы мүмкін

Қымбат көлік, бағалы заттар, шетелдегі демалыс немесе сән-салтанатты өмір салтын көрсететін жарияланымдар қоғам назарын аударуы ықтимал.

Егер мұндай дүниелердің заңды табыс көзі түсініксіз болса, мемлекеттік қызметшінің кірісіне қатысты сұрақ туындауы мүмкін. Бұл өз кезегінде оның жеке беделіне ғана емес, мемлекеттік қызметке деген сенімге де кері әсер етеді.

Лауазымды жеке пайдаға пайдалануға болмайды

Әлеуметтік желілерді коммерциялық қызметпен айналысуға, тауарлар мен қызметтерді жарнамалауға немесе мемлекеттік лауазымды жеке мүддеге пайдалануға жол берілмейді.

Сондай-ақ мемлекеттік рәміздерді, мемлекеттік органның атауын, беделін немесе ресурстарын жеке пайда үшін қолдану да талаптарға қайшы.

Пікірталаста эмоцияға берілмеген дұрыс

Мемлекеттік қызметкерлер желідегі пікірталастарда азаматтармен, әріптестерімен немесе мемлекеттік орган өкілдерімен ашық жанжалға бармауға тиіс.

Балағаттау, қорқыту, кемсіту және арандатушы пікірлер жариялау мемлекеттік қызметшінің кәсіби беделіне нұқсан келтіруі мүмкін.

Жарияламас бұрын өзіңізге үш сұрақ қойыңыз

Мамандар кез келген жазбаны жарияламас бұрын мына сұрақтарға жауап беруді ұсынады:

• Бұл жазба заңға және Әдеп кодексіне қайшы емес пе?
• Мен қызметтік жағдайымды жеке пайдама пайдаланып жатқандай әсер қалдырмаймын ба?
• Бұл жарияланым мемлекеттік қызметтің беделіне нұқсан келтірмей ме?

Егер осы сұрақтардың біріне күмән туындаса, жазбаны жарияламаған дұрыс.

Бұл талаптар мемлекеттік қызметкерлердің әлеуметтік желілерді пайдалануына тыйым салмайды. Негізгі мақсат – цифрлық ортадағы жауапкершілікті күшейту, әдеп нормаларын сақтау, сыбайлас жемқорлық тәуекелдерінің алдын алу және мемлекеттік қызметке деген қоғамдық сенімді қорғау.