"Самұрық-Қазына" қорының 2026 жылдың бірінші жартысында қанша пайда тапқаны анықталды

“Самұрық-Қазына” қорының 2026 жылдың қаңтар-маусым айларындағы таза пайдасы 21,8%-ға өсіп, 1,74 триллион теңгеге жетті. Ақпарат Қазақстан қор биржасында (KASE) жарияланған қордың шоғырландырылған қаржы есебінде көрсетілген. Бұл туралы Stan.kz ақпарат агенттігі хабарлайды. 

Қордың таза пайдасының артуына не әсер етті?

“Самұрық-Қазынаның” таза пайдасының артуына екі негізгі фактор әсер еткен. Біріншіден, активтердің құнсыздануынан болған шығын 80,9% азайған. Екіншіден, валюталық шығын 51,9% қысқарып, 58,9 миллиард теңгеге түскен.

Оқыңыз

Шығынға батқан Екібастұз ГРЭС-2 "Самұрықтан" қарыз алып, жеті басшыға 350 миллион теңге сыйақы төлеген Оқыңыз

Сонымен қатар еншілес компанияларды шығарудан түскен табыс 60,7% төмендеп, 55,3 миллиард теңге болды. Ал табыс салығына жұмсалған шығын 22,9% өсіп, 446,9 миллиард теңгеге жетті.

Қордың қаңтар-маусым аралығындағы түсімі 20,9% артып, 10,25 триллион теңге болды. Ал жалпы пайда 12% өсіп, 2,12 триллион теңгеге жетті.

Қордың табысының негізгі бөлігі шикі мұнай мен мұнай өнімдерін, алтын және уранды сатудан, теміржол арқылы жүк тасымалдаудан түскен.

“Самұрық-Қазына” сәуір-маусым айларында қанша пайда тапты?

Екінші тоқсанда “Самұрық-Қазынаның” таза пайдасы 27,8% өсіп, 1,13 триллион теңгеге жетті.

Еншілес компанияларды шығарудан түскен табыс 4,3 миллиард теңгеден 55,2 миллиард теңгеге дейін өсті. Ал активтердің құнсыздануынан болған шығын 75,7% қысқарып, 10,4 миллиард теңге болды.

Бұл ретте табыс салығына жұмсалған шығын 46% өсіп, 289 миллиард теңгеге жетті.

Екінші тоқсандағы түсім төрттен біріне өсіп, 5,55 триллион теңге болды. Бұл табыстың негізгі бөлігі мұнай мен мұнай өнімдерін, алтын және уранды сатудан, теміржол арқылы жүк тасымалдаудан түскен.

Жалпы пайда 11,3% өсіп, 1,21 триллион теңгеге жетті.

Ал бірінші жартыжылдықтағы өзіндік құн шамамен төрттен біріне өсіп, 8,17 триллион теңге болды. Ең үлкен өсім материалдар мен қорларға жұмсалған шығындардан байқалды. Бұл шығын 3,75 триллион теңгеден 4,92 триллион теңгеге дейін артқан.

Сонымен қатар еңбекке ақы төлеу, амортизация, отын және энергия шығындары да өскен.

Активтері, міндеттемелері және капиталы қанша?

2026 жылы 30 маусымдағы жағдай бойынша топтың активтері 46,67 триллион теңге болды. Бұл жыл басындағы көрсеткіштен 2,42 триллион теңгеге немесе 5,5%-ға көп.

Негізгі құралдардың көлемі 1,01 триллион теңгеге өсіп, 20,39 триллион теңгеге жетті. Ақша қаражаты мен оның баламалары 807,8 миллиард теңгеге артып, 4,41 триллион теңге болды.

Сауда дебиторлық берешегі де 328,8 миллиард теңгеге өсіп, 1,62 триллион теңгеге жетті.

Қордың міндеттемелері 10,5% өсіп, 18,86 триллион теңге болды. Қарыз көлемі 8,09 триллион теңгеден 8,94 триллион теңгеге дейін артты.

Сауда және өзге де кредиторлық берешек 351,7 миллиард теңгеге өсіп, 2,08 триллион теңгеге жетті. Ал өзге қаржы міндеттемелері 682,6 миллиард теңгеден 1,06 триллион теңгеге дейін өскен.

Маусым айының соңында “Самұрық-Қазынаның” капиталы 27,81 триллион теңге болды. Бұл жыл басындағы көрсеткіштен 629,3 миллиард теңгеге немесе 2,3%-ға жоғары.

Бөлінбеген пайда 978,9 миллиард теңгеге, яғни 7,3% өсіп, 13,36 триллион теңгеден 14,34 триллион теңгеге жетті.

Айта кетейік, бұған дейін  Қазақстанда ұлттық компаниялардың топ-менеджерлеріне былтыр қанша сыйақы берілгені туралы жазған едік.