"Салонда 50 адам болған": Қазақстаннан Моңғолияға бағыт алған автобус өртеніп кетті
Астанадан Моңғолияның Баян-Өлгейге қаласына бағыт алған рейстік автобус 20 шілдеде Ресейдегі тас жолда түгі қалмай өртенді. Бұл туралы Stan.kz ақпарат агенттігі хабарлайды.
Фото: Ресей ТЖМ
Ресейдің Алтай Республикасы бойынша төтенше жағдайлар министрлігінің мәліметінше, оқыс оқиға Оңғұдай ауданында болған.
"Сағат 06:13-те "Шу трактісі" Р-256 автожолының 720 шақырымында Астана (Қазақстан Республикасы) – Баян-өлгей (Моңғолия Республикасы) бағыты бойынша жүретін рейстік автобусының өртенгені туралы хабарлама келіп түсті. Салонда 50 адам болған, оның ішінде 15 бала бар, барлығы өздігінен эвакуацияланды. Қаза тапқандар мен зардап шеккендер жоқ", – делінген министрліктің таратқан хабарламасында.
Бұдан бөлек төтенше жағлайлар министрлігі сағат 06:14-те өрт орнына Оңғұдай ауылының №8 өрт сөндіру-құтқару бөлімінің өрт сөндірушілері барғанын мәлімдеді.
"Сағат 07:15-те өрт сөндірілді. Автомобиль жолымен көлік қозғалысы шектелмейді. Ресей ТЖМ күшімен жолаушылар Иня ауылындағы уақытша орналастыру пунктіне жеткізілді", – деді ТЖМ баспасөз қызметі.
- Алматыда тағы бір автобус апаты болды: Көз жұмғандар бар
Еске салайық, бұған дейін Павлодар облысындағы Майқайың кенішінде шұңқырға құлаған автобус ішінде болған жолаушылардың бірінің денесі табылғанын жазған едік. "Майқайыңалтын" АҚ бас директоры Қайролла Жүрсінбаевтың сөзінше, 19 шілдеде құтқарушылар взвод командирінің орынбасары Айдос Шаймерденовтің денесін тапты.