"Реал Мадрид" командасы "кэмбек" жасап, Чемпиондар лигасының финалына шықты
“Реал Мадрид” командасы үш минутта тамаша “кэмбек” жасап, Чемпиондар лигасының финалына шықты. Бұл туралы Stan.kz ақпарат агенттігі хабарлайды.
Фото: Reuters
“Сантьяго Бернабеу” стадионында өткен Чемпиондар лигасының жартылай финалдық қарымта кездесуінде “Реал Мадрид” командасы мюнхендік “Баварияны” жеңіп, он сегізінші рет Чемпиондар лигасының финалына шықты. Алғашқы таймда есеп ашылмағанмен, 68-минутта “Бавария” командасының ойыншысы Альфонсо Дэвис тамаша гол соғып, мюнхендіктерді алға шығарды. Дегенмен толассыз шабуылдың нәтижесінде королдік клуб есепті теңестіріп қана қоймай, алға шықты. 88-минутта ойынға жаңадан қосылған Хоселу қақпашы Нойердің қателігін пайдаланып, гол соқса, 91-минутта тағы да Хоселу “дубль” авторы және ойынның қаһарманы атанды. Сөйтіп “Реал Мадрид” командасы үш минутта екі гол соғып, жеңіске жетті. Алғашқы матчта қос команда 2:2 есебімен тең түскен еді.
Айта кетейік, бұған дейін “ПСЖ” командасын жеңген “Боруссия Дортмунд” 11 жылдың ішінде алғаш рет Чемпиондар лигасының финалына шыққанын жазған едік. Енді қос команда 1 маусым күні, финалда кездеседі.
