Қазақстанның барлық өңірінде дауылды ескерту жарияланды

26 маусымда Қазақстанның барлық өңірінде дауылды ескерту жарияланды. "Қазгидрометтің" мәліметінше, елдің бірқатар аймақтарында нөсер жаңбыр, найзағай, бұршақ пен екпінді жел күтілсе, оңтүстік өңірлерде аптап ыстық сақталып, жоғары және төтенше өрт қаупі жарияланды.

26 маусымда Қазақстанның барлық өңірінде ауа райының қолайсыз болуына байланысты дауылды ескерту жарияланды. Синоптиктердің мәліметінше, еліміздің солтүстік, батыс және шығыс өңірлерінде жаңбыр жауып, найзағай ойнайды. Кейбір аймақтарда нөсер жаңбыр, бұршақ, дауыл және екпінді жел соғады. Желдің жылдамдығы кей жерлерде секундына 20-28 метрге дейін жетуі мүмкін.

Еліміздің оңтүстік және оңтүстік-шығыс облыстарында аптап ыстық сақталады. Түркістан облысында ауа температурасы 40-41 градусқа, Жамбыл, Жетісу және Алматы облыстарында 35-38 градусқа дейін көтеріледі. Ұлытау, Қарағанды, Павлодар және Абай облыстарының кей аудандарында да күннің қатты ысуы болжанып отыр.

Оқыңыз

Ақтөбе облысында 19 жастағы жігітті найзағай соғып, мерт болды Оқыңыз

Сонымен қатар еліміздің көптеген өңірінде жоғары және төтенше өрт қаупі сақталуда. Әсіресе Алматы, Жетісу, Түркістан, Қызылорда, Шығыс Қазақстан, Абай, Ұлытау, Қарағанды және басқа да облыстарда табиғи өрттің шығу қаупі өте жоғары.

Елордада түнде аздаған жаңбыр жауып, найзағай соғады. Алматы қаласында таулы аймақтарда өткінші жаңбыр мен найзағай болжанып, шығыстан соғатын желдің екпіні секундына 15-20 метрге дейін күшейеді. Сонымен бірге қалада жоғары өрт қаупі сақталып отыр.

Мамандар тұрғындарды ауа райының күрт өзгеруіне байланысты қауіпсіздік шараларын сақтауға, дауылды жел кезінде сақ болуға және өрт қаупі жоғары кезеңде табиғат аясында от жақпауға шақырды.

Еске салайық, бұған дейін "Қазгидромет" шілде айында Қазақстанның бірқатар өңірінде бірқалыпты құрғақшылық күтілетінін хабарлаған еді. Сондай-ақ синоптиктер маусымның соңғы күндері еліміздің оңтүстік және шығыс аймақтарында ауа температурасы +40...+42 градусқа дейін көтеріліп, аптап ыстық сақталатынын ескерткен еді.