Мәліметтерге сенсек, Delta Bank ірі акционері Нұрлан Тілеубаев бұған дейін Forbes қазақстандық тізімінің экс-олигархы және Қазақстан астық одағының бұрынғы төрағасы болған.

Соттың мәліметінше, Нұрлан Тілеубаев Delta Bank акцияларының ірі пакетін иеленген және құрамына 140 фирма кіретін компаниялар тобын басқарған (олигархтың негізгі активтері "Алиби Холдингі" ЖШС, "астық сақтандыру компаниясы" АҚ және "АӨК-Инвест корпорациясы" ЖШС).

Айта кетейік, ол 2015 жылы ұлттық компаниялардың біріне тиесілі 4 млрд теңгеден астам соманы иемденіп алған.

"Ақша банкке "Агробизнес-2020" бағдарламасы бойынша түскеннен кейін айыпталушы бұл қаражатты қаржы ұйымының шоттарынан несиелерді қайта қаржыландыру сылтауымен оның бақылауындағы компанияларға аударып жіберген.

"Сотталушы жымысқы әрекетін іске асыру үшін ол жалған астық сатып алу-сату шарттарын қолданды. Кепілге ол 76 мың тонна астыққа қолхат, 4,8 млрд теңгеге ақшалай міндеттемелер және СҚО-да жалпы ауданы 16,5 мың гектардан астам жер телімдерін берді. Сотталушының кінәсі жәбірленушілердің, куәгерлердің, маманның айғақтарымен, сараптамалар мен аудитордың қорытындыларымен дәлелденді. Сот үкімімен Тілеубаев ҚК-нің 190-бабы, 4-бөлігі, 2-тармағы бойынша кінәлі деп танылды және 9 жыл мерзімге коммерциялық және қаржы ұйымдарында материалдық жауапты және басшылық лауазымдарды атқаруға байланысты қызметпен айналысу құқығынан айыра отырып, 6 жыл 8 айға бас бостандығынан айырылды", – делінген Астана соттары хабарламасында.

ҚК-нің 56-бабының, 6-бөлігінің негізінде осы үкім бойынша тағайындалған қатаң жазаны Алмалы аудандық соты 2023 жылғы 26 маусымда тағайындаған неғұрлым қатаң жазамен атқару жолымен қылмыстық құқық бұзушылықтар жиынтығы бойынша Нұрлан Тілеубаев қаржы ұйымының, банк және сақтандыру холдингінің басшы қызметкері лауазымын атқаруға және қаржы ұйымының ірі қатысушысы (ірі акционері) болуға өмір бойы тыйым сала отырып, қаржы және коммерциялық ұйымдарда 10 жыл мерзімге материалдық жауапты және басшы лауазымдарды атқару құқығынан айыра отырып, 10 жыл мерзімге бас бостандығынан айыру түріндегі жаза тағайындалды.

Үкім заңды күшіне енген жоқ.

"2023 жылдың маусым айында Алматыдағы сот Тілеубаевты колонияға жабу туралы 10 жылға үкім шығарғандықтан, ол үшін нақты жаза дәл осы мерзім болып қалды", – деді баспасөз қызметі.

Еске салайық, 2012-2017 жылдар аралығында Тілеубаев қайтарылмайтын несиелер беру арқылы банктен қаражатты заңсыз алып шығарған. Тергеу барысында Тілеубаев пен оның туыстарына тиесілі мүлік анықталып, оған тыйым салу туралы санкция берілді.

Ал былтыр мүліктің ішінде Чехияның Прага қаласында орналасқан элиталық мейрамхана, төрт бөлмелі пәтер және 3 компанияның 100% акциялары, сонымен қатар БАӘ-дегі құны шамамен 5 миллион долларлық Palm Jumeirah-та орналасқан вилла барын жазған едік.

Сонымен қатар Латвиямен ынтымақтастық аясында халықаралық тергеу кепілдігін жіберу арқылы "Вентспилс астық терминалының" 100% үлесін бұғаттау санкциясы енгізілді.

Талқылау