Нью-Йоркте 40 жылда алғаш рет ең қуатты жер сілкінісі болды (видео)
5 сәуірде АҚШ-тың шығыс жағалауында болған 4,8 балдық жер сілкінісінің дүмпулері Нью-Йорк пен оның айналасында сезілді. Бұл туралы Stan.kz ақпарат агенттігі BBC арнасына сілтеме жасап хабарлайды.
Фото: squarenews.ru
Жер сілкінісінің эпицентрі Нью-Йорк қаласынан батысқа қарай 40 миль (64 км) жерде, Нью-Джерси штатындағы Лебанонға жақын жерде болды. Нью-Йорк пен оның маңындағы аудандарға келтірілген шығын көлемі нақтыланбады. Қаланың өрт сөндіру қызметі зілзаланың салдарын бағалауда.
Американың шығыс жағалауында жер сілкінісі сирек кездеседі және бұл Нью-Йорктегі кейінгі онжылдықтардағы ең күшті жер сілкінісі болды. Әлеуметтік желі қолданушылары жер сілкінісі Филадельфиядан Нью-Йоркке дейін және шығыс жағалауда Бостонға дейін сезілгенін хабарлады.
Өткен жылы Буффалода (Нью-Йорк) 6 ақпанда магнитудасы 3,8 балдық жер сілкінісі болды. Алайда бұл аймақта 40 жыл бойы мұндай жер сілкінісі болмаған.
1983 жылы Нью-Йорк штатының оңтүстігіндегі Ньюкомбта 5,1 балдық жер сілкінісі болды.
Фото: BBC
Нью-Йорк қаласының мэрі Эрик Адамс 5 сәуірде болған жер сілкінісінің ауыр зардаптары туралы мәлімет жоқ екенін айтты.
"Қазір бізде елеулі әсерлер туралы есеп болмағанымен, оларды әлі де зерттеп жатырмыз. Құтқарушылар қала қауіпсіздігін сақтау үшін жұмыс істеп жатыр. Нью-Йорк тұрғындары әдеттегі жұмыстарымен айналыса берсе болады", – деп жазды ол X әлеуметтік желісінде.
Жер сілкінісі салдарынан Нью-Йорктің бірнеше әуежайы жұмысын уақытша тоқтатты. Нью-Джерсидегі Джон Кеннеди халықаралық әуежайы мен Ньюарк әуежайында рейстер тоқтатылды. Алайда қазір рейстер әдеттегідей қайта жалғастырып жатыр.
Нью-Йорк штатының губернаторы Кэти Хокул бүгінгі жер сілкінісінің қауіпті болғанын атап өтті. Алайда "өмірге қауіп төндіретін жағдайлар" анықталмағанын және оның командасы штаттың инфрақұрылымын тексеріп жатқанын жеткізді.
Нью-Йорктегі ВВС тілшісі Нада Тауфиктің айтуынша, жер сілкінісі 20 секундқа созылған.
Ал жергілікті тұрғындар Ники Влейсидес пен анасы Перра Влейсидестың сөзінше, олар жер сілкінісі кезінде Бруклинде көпқабатты үйде болған. Олар бүкіл ғимараттың дірілдеп жатқанын сезіп, пижамаларымен сыртқа жүгірген екен.
"Біз калифорниялықпыз. Сол себепті жер сілкінісі болғанын бірден білдік. Екі-үш минуттан кейін үйден қашып шықтық", – деді Ники Влейсидес.
Калифорниядан Нью-Йоркке келген Перра өзінің туған қаласы Сан-Клементеде (Калифорния) кем дегенде 10 ірі жер сілкінісін және ондаған кішігірім жер сілкіністерін бастан өткергенін айтты. Алайда бұл жолы болған дүмпуді бұрын-соңды сезінбеген ең күшті жер сілкінісі болғанын жеткізді.
"Калифорнияда үлкен жер сілкінісі болған кезде кейбір ғимараттар қирауы мүмкін. Біз мұны Лос-Анджелесте көрдік және бастан өткердік", – деді ол.
Айта кетейік, бұған дейін Тайваньда кейінгі 25 жылда болмаған қуатты жер сілкінісі болғаны туралы жазған едік. Салдарынан жеті адам мерт болып, елуден астам тұрғын жарақат алды.