Ақтаудағы ұшақ апаты: Зардап шеккендерге көмек көрсету үшін тұрғындардан қан тапсыруды сұрап жатыр
Маңғыстау облысының қан орталығы жергілікті тұрғындарға үндеу жасады. Мамандар ұшақ апатынан зардап шеккендерге көмек көрсету үшін тұрғындардан қан тапсыруды сұрап жатыр. Бұл туралы Stan.kz ақпарат агенттігі хабарлайды.
Фото: freepik.com
Ведомство барша тұрғындардың бұл жайтқа бейжай қарамауын өтінді.
“Облысымыздың барлық тұрғындарынан қазір орталыққа келіп, қан тапсыруларын сұраймыз. Егер сау болсаңыз, бүгін майлы тағамдарды тұтынбасаңыз және ең бастысы мұқтаж адамдарға көмектескіңіз келсе, онда біз сіздерді бүгін 25 желтоқсанда сағат 16:00-ге дейін күтеміз”, – делінген Маңғыстау облысының қан орталығының хабарламасында.
Еске салсақ, Ақтау маңында ұшақ құлағаны туралы хабарлаған едік. Ұшақта 62 жолаушы мен 5 экипаж мүшесі болған. Апат орнында аман қалған 27 науқастың 11-і ауыр жағдайда жансақтау бөліміне жатқызылды. Дәрігерлердің мәліметінше, сонымен қатар 11 және 16 жастағы екі бала да ауруханаға түсті. Қазір оларды отаға дайындап жатыр.
Апаттың алдын ала себебі оның құстарға соғылуынан екені айтылды. Өкінішке қарай, аман қалғандардың тізімінде қазақстандықтар жоқ.