Жапаровтың жиені Лаззат Нұрқожаеваға сүйіктісі 24 маусымда Оруу-Сай шатқалында ұсыныс жасаған. Бойжеткен ол жаққа ер адаммен бірге Қырғызстан төтенше жағдайлар министрлігінің тікұшағымен барған. Бұл оқиға тұрғындар арасында наразылық тудырды. Әлеуметтік желі қолданушылары президенттің туыстарының әрекетін қатаң сынға алды.

Садыр Жапаровтың айтуынша, Лаззат Нұрқожаеваның болашақ күйеуі президенттің ысырапшылдыққа бармау туралы бастамасын қолдауы керек еді.

"Дұрыс айтасыз, ысырапшылдықты тоқтату керек деп айтып жүрмін. Ең болмаса, болашақ күйеу балам бұл бастамамды қолдап, мені де, өзін де қоғамның сынына қалдыратынын ойлануы керек еді. Әлі жас болғандықтан осылай жасады деп ойлаймын", – деді президент.

20 млн долларлық ғимарат: Қырғызстан президенті мүлкін заңдастырып, елге көрсетті

Жапаров Қырғызстанның төтенше жағдайлар министрлігі жаңа тікұшақтар сатып алғанын атап өтті.

"Біз тікұшақтарды коммерциялық мақсатта пайдалануға рұқсат бердік, олар өз құнын ақтауы керек қой. Әрбір тиын мемлекет бюджетіне түседі, осылайша әуе кемелері де тұрақты жаңартылады", – деді Садыр Жапаров.

Қазір республика бойынша 20-ға жуық тікұшақ бар. Садыр Жапаров туған-туыстары мен балаларына қатаң талап қоятынын баса айтты.

"Мен оларға бұрынғы басшылардың қателіктерін қайталаудың қажеті жоқ екенін үнемі айтып отырамын, мемлекеттік істерге араласпауларын сұраймын", – деді ол.

Президент жиенінің әрекеті үшін кешірім сұрады.

"Бұрын басқаларды сынайтынмын, қазір өзімнің жиенім үшін халықтан кешірім сұрап отырмын. Ол әлі жас, осы оқиғадан дұрыс қорытынды шығарады деп сенемін”, – деді президент.

Еске салсақ, бұған дейін Бішкекте сыбайлас жемқорлыққа қатысты қылмыстық бап бойынша президент Садыр Жапаровтың туысы Ұлан Жапаров ұсталғаны туралы жазған едік.

Талқылау