Навальный өзінің уланғанына Ресей үкіметі кінәлі екенін айтады. Әсіресе, Путиннің тікелей қатысы бар деп санайды. Ресей билігі Навальныйдың улануына қатыстары жоқ екенін айтты.

"Соңына дейін жеткіміз келсе, жеткізетін едік", - дейді Путин.

Навальныйдың рейсі жексенбі күні кешке Шереметьево әуежайына қонды. Мәскеуге ұшып келе сала оппозиционерді паспорт бақылау бекетінен тұтқындады. Артынша Навальныйдың Химках полиция бөлімшесіне жеткізілгені белгілі болды.

Саясаткердің әуежайда ұсталатыны алдын ала болжанған болатын. Федералды қылмыстық-атқару қызметінде айтылғандай, Навальный Ив Роше ісі бойынша шартты жазаның шарттарын бұзды. Федералдық қылмыстық жазаны орындау және федералды іздестіру комитеті желтоқсанның аяғында соттан шартты жазаны қарапайым жазаға ауыстыруды сұрады. Сот отырысы 29 қаңтарда өтеді.

Навальный Берлиннен Внуково әуежайына қарай ұшқан. Алайда ұшақ бағытын өзгертіп, Шереметьево әуежайына қонады. Ресейлік оппозиционердің әйелі мен адвокаты кеден бекітінен өтіп кеткен, дегенмен Навальныйдың өзі тұтқындалыпты.

Құқық қорғаушылар, ЕО елдері мен Америка Құрама Штаттары Ресей билігіне жексенбіде ұсталған саясаткерді босатуды сұрады.

"Өзіне сенімді саяси лидерлер бәсекелестіктен қорықпайды, саяси қарсыластарына күш қолданбайды және заңсыз тұтқындауды ұйымдастырмайды. Орыс халқы, басқалар сияқты, ашық пікірлер білдіретін жағдайды сақтап, сенім ұялатып, ашық түрде әрекет етеді деген үміттенеміз", - деді АҚШ мемлекеттік хатшысы Майк Помпео.

"Кремльдің Навальныйға жасаған шабуылы - бұл тек адам құқығын бұзу емес, сонымен бірге барлық ресейліктерді қорлау", - деп жазды сайланған президент Джо Байденнің ұлттық қауіпсіздік жөніндегі кеңесшісі Джейк Салливан.

Сенатор Берни Сандерс те Алексей Навальныйды босатуға шақырды.

"АҚШ сыбайлас жемқорлықпен күресіп, бүкіл әлемде демократия үшін жұмыс істейтіндерді қолдауы керек", - деп жазды ол.

Франция сыртқы істер министрлігі өзінің Twitter-дегі парақшасында Алексей Навальныйға қатысты жағдайға қатты алаңдайтынын және еуропалық серіктестерімен бірге оның дамуын қадағалайтынын жазды. Аустрия, Италия, Чехия, Польша, Эстония, Латвия және Литва Францияға орыс оппозиционерін дереу босату талабымен қосылды.

Польша премьер-министрі Матеуш Моравецки Еуропалық одақтан Навальныйдың ұсталуына жауап беруін талап етті. Чехия сыртқы істер министрі Томаш Петричек ЕО сыртқы істер министрлері кеңесінде оппозициялық саясаткердің қамауға алынуына байланысты Ресей басшылығына қарсы санкциялар мәселесін талқылауға ниетті екенін айтты. Балтық елдері де Ресейді санкциялармен қорқытты.

"ЕО жедел әрекет етуі керек, егер Навальный босатылмаса, шектеу шараларын енгізу осындай өрескел әрекеттерге жауап ретінде қарастырылуы керек", - делінген Эстония, Латвия және Литва сыртқы істер министрлерінің бірлескен мәлімдемесінде.

Еуропалық кеңестің басшысы Шарль Мишель Навальныйдың ұсталуын қолайсыз деп атап, Ресей билігін оны босатуға шақырды. Еуропалық парламенттің басшысы Дэвид Сассоли оппозицияшылды Брюссельге шақыруға дайын екенін айтты.

"Ресейге ұшып кеткен Навальныйды тұтқындау - бұл алаңдаушылық тудыратын маңызды оқиға. Біз оны тез арада босатуға шақырамыз. Сонымен қатар, оның құқықтары сақталады деп үміттенеміз", - деп жазды Италияның сыртқы істер министрі Луиджи Ди Майо.

Amnesty International құқық қорғау ұйымы Навальныйды ар-ұждан тұтқыны деп таныды және Ресей билігінен оппозиционерге қарсы қатігездік танытуды дереу тоқтатуды талап етті.

Талқылау