Мерзімінен бұрын өтетін президент сайлауы: Тоқаев қандай мерзімге сайланбақ
Әділет вице-министрі Алма Мұқанова алдағы күзде мерзімінен бұрын өтетін президенттік сайлауда президент Қасым-Жомарт Тоқаевтың қандай мерзімге сайлануы мүмкін екенін түсіндірді, деп хабарлайды Stan.kz ақпарат агенттігі.
Қазақстан президенті Қасым-Жомарт Тоқаев. Фото: Akorda.kz
Журналистер вице-министр Алма Мұқановадан күзде өтетін кезектен тыс президент сайлауында мемлекет басшысы Қасым-Жомарт Тоқаев қандай мерзімге сайлануы мүмкін екенін сұрады.
"Тиісті заң жобасы парламентке қыркүйекте енгізіліп, қазан айында қабылданды делік. Ал сайлау қарашаға белгіленсе, Конституцияға өзгерістер енгізетін заңда жаңа норма қол қойған күннен бастап күшіне енеді делінсе, онда жаңа сайланған президент Конституцияның жаңа баптарын басшылыққа алады. Яғни жеті жылға және бір мерзімге сайланады", - деп түсіндірді Мұқанова.
Бұдан бұрын вице-министр заң бойынша сайлауға дайындалуға екі ай берілетінін айтқан болатын. Сол себепті алдағы кезектен тыс президент сайлауы биыл қараша айында өткізілуі мүмкін.
- Тоқаев Қазақстанды 2029 жылға дейін басқарады: Президентке кезектен тыс сайлау өткізу не үшін қажет?
Айта кетсек, Конституцияның қолданыстағы нормасына сәйкес, президент өкілеттігінің мерзімі бес жылды құрайды. 1 қыркүйекте ел халқына жолдауында Қасым-Жомарт Тоқаев президенттік мерзімді 7 жылға дейін ұзартуды және бір мерзімге ғана сайлауды ұсынды. Яғни қайта сайлануға тыйым салынады.
Бұдан басқа Қасым-Жомарт Тоқаев биыл күзде кезектен тыс президент сайлауы өтетінін жариялады.