"Менімен селфи жасағысы келді": Айдана Меденова босану кезінде қандай қиындыққа тап болғанын айтты
Айдана Меденова тұңғышын босанғанда перзентханада ыңғайсыз жағдайға тап болғанын айтады. "Таяқтың да екі ұшы болады" дегендей, өзі өмірмен арпалысып жатқанда танымалдылығының кесірі тиген. Аурухана қызметкерлері Айдананы танып, толғақ қысқан сәтте селфи жасауға тырысқан. Ол аздай, басшылардың бірі Айдананы алдына шақырып алып, әбден маза-құтын қашырған. Бұл туралы Меденова Айнұр Іляисованың "MOM'sкий әңгіме" подкастында айтты, деп хабарлайды Stan.kz ақпарат агенттігі.
Айдана Меденова бүгінде бір қыз, бір ұлдың анасы. Ал перзентханадағы "қызықтар" тұңғышы Әминаны босанған кезінде болған.
"Толғақ болғанда менімен селфи жасағысы келді. Ол әрине, мен үшін қалыпты, үйреншікті жағдай. Бірақ босанып жатқанда түскенін мен түсінбедім. Бәрібір де сыпайы түрде: "Мен бірінші босанып алайын, сосын суретке түсейік", - деп айттым", - дейді Айдана.
Әнші босанған күннің ертеңіне сол мекемедегі басшылардың бірі Айдананы жеке кабинетіне шақырыпты. Зәре-құты қашқан Айдана баланың денсаулығына қатысты болар деп алаңдаған. Алайда шын мәніндегі себеп басшылардың әншіге деген қызығушылығында болып шыққан.
"Өзіммен өзім алысып жатқанда: "Балаңызды қалдырыңыз да, үшінші қабатқа көтеріліңіз", - деді. Бірдеңе болып қалды ма деп ойладым.
Кірсем, бір әйел отыр екен. "Меденова ма? Кел, отыр", - деді. Телефонын ақтарып отырып: "Сен ба не Меденова, біздің перзентханаға келген?" - деп жалғады. "Иә, маған бәрі ұнап жатыр. Не боп қалды?"- деп қоямын.
“Түрің өмірде мүлдем басқа екен ғой. Өткенде Салтанат Бақаеваны көргенбіз. Теледидарда басқасыңдар", - деді. Мен өте тәрбиелі адаммын. "А-а-а" деп қоя салдым. Сонда әрі-бері акушер, санитар дәрігерлер өтіп жатыр. Оларға қарап: "Қараңдар, кім келді! Сендер онымен фотоға түсейін деп жүрсіңдер. Ал ол өзі маған келді", - деді ғой. Мен ол кісіге таңырқап қарадым. Ішімнен: "Сіз сонда мені сол үшін шақырдыңыз ба?" - деп ойладым. Сонда да айтқан жоқпын.
30-40 минуттай сол жерде отырдым. Балам айдалада жатыр. Ана кісі де қояр емес. Сосын керек адамдармен фотоға түстім. Негізі өзіме залал келтіретін нәрсе жасадым, бірақ өзім ешкіммен ұрыспайтын адаммын. Басқаша болуы мүмкін де емес еді. Әрі ол кезде жаспын", - деп түсіндірді Меденова.
Еске салайық, аталған сұхбатта Меденова анасы қайтыс болғанда өзіне қол салғысы келгенін ашық айтқан еді.