Нағыз ғажап: 8 жыл бойы сөйлемеген бала анасына тіл қатты
Әлемде қуаныш пен бақыттың өлшемі жоқ. Әсіресе, ана бақытының. Атырауда дүниеге келгелі 8 жыл ешкіммен сөйлеспеген бала бір ақ сәтте анасына «мама, мен сені жақсы көремін!» депті. Осы бір ауыз сөз Эльмира Лұқпанова үшін өмірінің ең үлкен жаңалығына айналды, деп хабарлайды Stan.kz ақпарат агенттігі 31 арнаның "Информбюро" жаңалықтар бағдарламасына сілтеме жасап.
"Қолындағы нәрсесіне қуанып, "мама, мама" деп кірді. Артынша "мама, мен сені жақсы көремін" деп айтты. Не болғанын өзім де түсінбей қалып, қайталашы деп айттым", - деді Эльмира Лұқпанова.
Анасы жылдар бойы баласының сөйлегенін естігісі келген. Бұған дейін баланың тілі тек ағылшын әріптеріне келіпті.
"Ағылшынның әріптерін үйреттік, оның барлығын айтып шығады, бірақ басқаша тіл қатпайды", - деп қосты Эльмира.
8жасар Айбектің туғанынан психикалық дамуында бөгеліс бар көрінеді. Ата-анасы ұлын өткен жылдан бастап арнайы оңалту орталығына беріпті. Ұлының аяқ астынан сөйлеуі осы орталықтағы қызметкерлердің жемісі дейді қуанышын жасыра алмаған ана. Бұл отбасының тағы бір баласы Азат та аутизм дертіне шалдыққан. Анасы Азаттың өте байырмал және сезімтал екендігін айтты. Дегенмен ол барлық адамды жақын қабылдай бермейді екен, ал қонаққа барған үйдің аурасы ұнамаса Азат баспананың табалдырығын аттамай қоятын көрінеді. Балаларының бойынан байқалған кез келген өзгеріс біз үшін үлкен қуаныш дейді Эльмира.
Тағы оқыңыз
- Елордалық дәрігерлер қайтыс болып кеткен науқасты тірі деп айтқан
- Алматы облысындағы ауылда мектеп психологі педофилді түрмеге жапты
"Басқалары түсінбей шығар, бірақ мен үшін бұл үлкен дәреже, үлкен бақыт", - деді балалардың анасы.
Бұл отбасында бір қыз, екі ұл бар. Ерекше ұлдарды тәрбиелеп отырған отбасы өмірге өкпелері жоқ екендігін айтады. Отбасының отағасы Айбек Лұқпанов - қарапайым электрик. Айбектің баратын оңалту орталығына айына 165 мың теңге төлейтінін де жасырмады. Ал жақында көліктерін баспана алу үшін сатып жіберген көрінеді.