"Матушка Земля, святая Русь": Қостанайдағы колледжде орындалған ән желідегілердің ашуын туғызды

Қостанайда әлеуметтік-техникалық колледжде “Матушка Земля” әні шырқалып, бұл қазақстандықтардың наразылығын тудырды. Бұл туралы Stan.kz ақпарат агенттігі хабарлайды. 

Бұл ән 1 қыркүйекте шырқалған. Желіде білім ордасында түсірілген видео тарады. Кадрдан студенттердің оқу орны аумағында жүргенін, ал бір қыздың жаңғыртып осы әнді шырқап тұрғанын көруге болады.

“Матушка-земля, белая берёзонька… Для меня - Святая Русь, для других – занозонька”, – делінген ән мәтінінде.

Желі қолданушылары әнді насихат сипатында деп бағалады. Ал енді бірі оның 1 қыркүйек Білім күніне сәйкес келмейтінін жазды.

“Әрине, бұл ән. Бірақ жай ән емес, насихат сипатындағы ән”.

“Қостанайдағы колледжде 1 қыркүйекте “Матушка Земля” әні шырқалып жатыр. Колледж басшылығына шара қолдануды талап етемін”.

“Әсіресе мұндай әннің 1 қыркүйек – Білім күнінде орындалуы қаншалықты орынды?”.

 “Мынау не масқара? “Матушка Земля” дегені несі? Біріншіден, бұл ән Білім күніне сәйкес келмейді. Екіншіден, Қостанай – қазақ жері. Ресейдің патриоттық әні біздің елдің төрінде неге шырқалып жатыр?”.

“Не деген насихат? Қазақстан азаматы ретінде аталған колледж директоры мен оқу-ағарту ісі жөніндегі мамандардың үстінен қызметтік тексеру жүріп, жұмыс орнынан босатылуын талап етемін. Сонымен қатар Қостанай қаласының барлық оқу орындарын тексеру жұмыстарын жүргізулеріңізді сұраймын!”. 

Stan.kz Қостанайдың білім басқармасынан мән-жайды сұрады. Алайда әзірге ресми түсініктеме бермеді. 

Айта кетейік, бұған дейін Қазақстан азаматтығын алған ер адам желідегі қазақ тіліне қатысты жазбасы үшін жазаланғаны туралы жазған едік.