Маңғыстаудағы сарбаз өлімі: Іс қасақана адам өлтіру бабымен тергеледі
Бас әскери прокуратура баатыс өңірлік әскери-тергеу басқармасының қасақана кісі өлтіру фактісі бойынша сотқа дейінгі тергеуді бастағанын мәлімдеді. Бұл туралы Stan.kz ақпарат агенттігі хабарлайды.
"2024 жылғы 7 қыркүйекте сағат 17:10 шамасында Ақтау қаласындағы ҚР ҚМ әскери бөлімдерінің бірінің взвод командирі "Оймаша" полигонының аумағында ПМ табельдік тапаншасынан қатардағы Б-ға оқ атып, соңғысы қайтыс болды. Сол күні Батыс өңірлік әскери-тергеу басқармасы қасақана кісі өлтіру фактісі бойынша сотқа дейінгі тергеуді бастады (ҚК 99-бабының 1-бөлігі)", – делінген хабарламада.
Тергеу органы күдіктіні Қылмыстық іс жүргізу кодексінің 128-бабы тәртібімен ұстады және Ақтау қаласының уақытша ұстау изоляторына қамауға алды. Қажетті кешенді тергеу амалдары жүргізілуде, қылмыстың себептері мен өзге де мән-жайлар анықталуда. Іс бойынша процестік прокурор тағайындалды.
Тергеу барысы Бас әскери прокуратураның ерекше бақылауына алынды.
"Қылмыстық процестік кодекстің 201-бабына сәйкес басқа мәлімет жарияланбайды", – делінген Бас әскери прокуратураның хабарламасында.
Еске салайық, бұған дейін Маңғыстау облысындағы "Оймаша" полигонында "Батыс" өңірлік қолбасшылығы бөлімдерінің жиыны кезінде сарбаз көз жұмғаны туралы хабарлаған едік.