Ләззаттың екі баласы және екі немересі бар. Әйелдің айтуынша, өзі 15 жыл бұрын экс-күйеуімен ажырасып кеткен. Ерлі-зайыпты танысқан кезде бастары бос болған. Олар Алматы халықаралық әуежайында танысып, таныстықтары әрі қарай жақын араласуға ұласқан.

"Жаздың ыстық күндерінің бірі еді. Сол уақытта жаңа әуежайдың құрылыс жұмыстары аяқталмаған. Чемоданыма базарлық толтырып алып, құрбыларыма, туыстарыма апара жатырмын. Тексеруден өткен соң шөлімді басайын деп суық сыра ішкім келді. Алайда бармен шөлмекті ашатын құрылғы жоқ екенін айтып, басқасын алуды ұсынды. Бой бермей тұрған кезде бір ер адам жақындап, шөлмекті ашып берді. Сол уақытта ол қай бағытқа ұшып бара жатқанымды сұрады. Осы сәтте Астанаға барамын дедім. Ол қуанып кетіп, “бәлкім бір рейспен ұшармыз” деді. Ол сыртқа шығайық деп, кейіннен менің жеке ұялы телефонымның нөмірін сұрады", – деді Ләззат.

Ләззаттың айтуынша, номерін бергеннен кейін ер адам қашан қолы босайтынын сұраған.

"Біз Астанаға ұшып келдік, мені құрбым күтіп алды. Ал ол менің чемоданымды машинаға тиеп, кейінірек хабарласамыз деп келістік. Бастапқыда құрбыммен барға баруды ойлаған едім, бірақ онымен жақын арада кездесетінімді түсініп, үйге тезірек барып, киім ауыстыруды ұйғардым. Ақ көйлек киіп, макияжымды жаңартып, әтір сеуіп, дайын болдым. Құрбымның көлігіне отырып, барға бет алдық. Сол кезде ол қоңырау шалып, қайда екенімді сұрады. Ол да өте керемет, кашемирден жасалған сұр свитер киіп, жағымды әтір сеуіп алған. Сол шақ әлі есімнен кетпейді. Құрбым бізге өзара сөйлесуге мүмкіндік беру үшін шығып кетті. Онда өте керемет саксофонист ойнап жатқан еді. Әуеннің уақыты аяқталып қалғанда күйеуім оған қосымша төлем жасап, тек мен үшін оның ойнау уақытын ұзартып қойды. Барлығы сондай романтикалық әрі әдемі өтті", – деді әйел.

@l.m_7771 #отношениямужчинаиженщина #психологияотношений #замужв50 ♬ Сен маған сүюді үйреттің - YerMusic

Ләззат күндердің бір күні елордалық туыстарына тағы да ұшып барады. Сонда ер адам одан қашан келетінін сұрап, “барлық жақыныңды жина, мен барамын, танысқым келеді” дейді. Сөйтіп, ол келіп, әйелдің әкесінен ақ батасын сұраған. Бақыттан басы айналған Ләззат бірден ұсынысты қабыл алған.

"Барлығы таңданды, бұл бәріне күтпеген жағдай болды. Бауырларым әзілдеп, болашақ күйеуіме "оның мінезі бар, жақсылап ойланып көрдің бе?" деп сұрады. Балаларым қарсы болмады. Ұлым үйленген, қызым тұрмыста. Олар маған "өз өміріңді жаса, өз адамыңды табудан қорықпа" деп үнемі айтады. Олар мен таңдаған адамды қабылдайды. Қазір де өте жақсы араласады. Қызыммен бір қалада тұрғандықтан, онымен жиі араласып тұрамыз. Немеремнің үлкені 7 жаста, өте көңілді. Қазір атасына "сен не істеп жатырсың?" деп айтатын кездері бар. Күйеуімнің де балалары бар, бірақ олармен әлі танысқан жоқпын. Мүмкін, уақыт өте келе танысамыз. Ортақ балаларымыз туралы әзірше ойламаймыз, бірақ бәрі мүмкін. Біз де Баян мен Түрсен Алагөзовтар секілді жоспарлап қалармыз. Ол әбден мүмкін", – деді Ләззат.

“Мәһрге көлік сұрадым”

Ләззаттың айтуынша, неке қию кезінде имам оларға неше түрлі сұрақ қойып, болашақ жұбайларды сынаған екен. Ол мәһрге не сұрағанын да айтып берді.

“Мәһрге көлік сыйға тартуын сұрадым. Ол бұған қарсы болмады. Бұдан кейін біздің неке қию рәсімінде имам менің мінезіме қарап, күйеуіме бағынып, оны тыңдайтыныма бірнеше рет көз жеткізгісі келді. Мен әрине, басымды иіп, орамал тағып, “иә” деп жауап бердім. Ол мысал ретінде, егер әкем науқастанып қалса, ал күйеуім рұқсат бермесе, мен әкеме бара алмайтынымды айтты. Имамның бұл сұрағына таңданып қалдым. Некелескен күннен біраз уақыт өткен соң Дубайға ұшу керек болды. Күйеуімнен рұқсат сұрап, “мен Дубайға барсам, бола ма? Оқуымды жалғастыру керек, бұл маған өте қажет және ұнайды” дедім. Әрине, оған бұл ұнаған жоқ, ол үндемей қалды. Бірнеше рет сұрадым, бірақ жауап алмадым. Соңында “Егер рұқсат бермесең, әрине, мен бармаймын" дедім. Сонда ол әзілдеп "сені қалай жібермеймін?” деп жауап берді. Осындай сәттерде 15 жыл бойы жалғыз жүргеннен кейін біреуге бағынып, өзіңнің тәуелсіздігіңді жоғалту да қиын. Әсіресе, өзіне сенімді, тәуелсіз әйелдер үшін. Қарым-қатынас – үнемі жұмыс пен түсіністік қажет ететін процесс”, – деп түсіндірді әйел.

Фото Ләззаттың жеке архивінен

“Қайтадан жар болуды үйренуіме тура келді”

Ләззаттың сөзінше, 50 жаста қарым-қатынастар басқаша, әлдеқайда саналы болады.

"Бірақ еркіндікке үйреніп қалғандықтан, енді қайтадан жар болуға үйренуіме тура келді. Өзімді әйел, үй иесі, жұбайымның досы ретінде қайтадан еске түсіремін. Тамақ әзірлеуді, күйеуімді жұмысқа жинауды, сапарларым мен кездесулерімді келісуді қайтадан үйреніп жатырмын. 50 жаста бәрі басқаша, бірақ жастардағыдай сезім мен эмоциялар да бойды билейді. Біз Алладан берілген уақытты барынша қуана өмір сүруге және бір-бірімізді қорғауға жұмсаймыз деп шешім қабылдадық. Уақыт пен өмір бәрін көрсетеді! Ең маңызды өмір сабағы – әр күнге, әр сәтке қуану. Өмірді, адамдарды сүю және жақындарыңмен жиі уақыт өткізу", – деді ол.

Ләззат әйел үшін 50 жасында тұрмысқа шығу кеш емес екенін алға тартады.

"Қоғамда әйелдерге қатысты көптеген стереотиптер мен қалыптасқан түсініктер бар. Соның бірі – "белгілі бір жасқа келгенде тұрмысқа шығу кеш болады" деген пікір. Алайда қазіргі заманда бұл көзқарас өзгеріп келеді және әйелдер үшін 50 жасында да махаббатты тауып, тұрмысқа шығу кеш емес деген түсінік кеңінен таралып жатыр. Бұл өзгерістің себептері мен артықшылықтарына тоқталайық. 50 жас – әйелдің көп нәрсені көріп, өмірден түйген кезеңі. Бұл жаста әйел өзін жақсы біледі, нені қалайтынын және нені күтетінін түсінеді. Ол өмірлік серігін таңдау кезінде өзіндік құндылықтарын ескеріп, болашақта шынайы қарым-қатынасты құра алады. Жастарда кездесетін қателерден, асығыс шешімдерден сақтанып, саналы түрде таңдауға мүмкіндік бар", – деді Ләззат.

Ләззаттан “сіз ТикТокқа 50 жасыңызда күйеуге шыққаныңызды салдыңыз?” деп сұрап көрдік.

“Бұл видеоны әйелдер ешқашан үмітін үзбесін, кез келген жаста сүйікті адамын кездестіріп, жаңа отбасын құруға болатынын түсінсін деп салдым. Қазір ажырасқан адамдар көп, бірақ соған қарамастан, әйелдер өздерін жақсы көріп, үмітін үзбей, сүйіктісін кездестіруге сенуі керек. 60 жаста да өзіңнің сүйікті адамыңды кездестіруге болады. Шынымен де, осындай ниетпен салдым, себебі менің жасымдағы көптеген құрбым мен танысым үмітін жоғалтып, өздерін күтпей кеткен. Олардың ойынша, жастар көп, бәрі соларға тұрмысқа шығуға ұмтылып жатыр, ал біздер үшін бәрі біткендей. Бірақ шын мәнінде олай емес. 50 жаста өмір енді ғана басталады, сондықтан мұңайып, үміттерін үзудің қажеті жоқ. Мен осыны айтқым келді”, – деп түйіндеді сөзін Ләззат.

Талқылау