"Косметикаға және тапсырыс беріңіз": Қазақстандағы белгілі "Золотое яблоко" дүкенінің жарнамасында қате кеткен
Алматы көшелеріндегі косметика мен парфюмерия сататын белгілі "Золотое яблоко" компаниясының баннерінің мәтіні қазақшаға қате аударылған. Stan.kz тілшісі осы мәселе жөнінде маркетинг бөлімінен мардымды жауап ала алмады.
Фото: Stan.kz
Алматыдағы "Золотое яблоко" баннеріндегі жарнамада "Заказывайте косметику и не только" деп орысша жақсы жазылған. Ал осы мәтінді қазақшаға "Косметикаға және тапсырыс беріңіз" деп қате аударыпты.
Мұндай қате жарнаманы неліктен орналастарды деп, компанияның WhatsApp желісіне жазып көрдік.
"Өкінішке қарай, қатені қарау уақытты алады. Егер сізге жауап келмесе, ынтымақтастықтан бас тартылған болуы мүмкін", – деді маркетинг бөлімінің менеджері.
Біздің ойымызша, "Косметикаға және тапсырыс беріңіз" деген сөйлемнің орнына "Косметикаға және басқасына да тапсырыс беріңіз" немесе "Косметиканы және басқасын да тапсырыспен алдырыңыз" деп жазған дұрысырақ. Себебі мұндағы "Басқасына да" деген тіркес орысшасындағы "и не только" деген мағынаны береді. Ал "да" демеулік шылауы өзі жалғанған сөздің әлі бірнешеуі бар екенін білдіру үшін қолданылады.
Еске салайық, бұған дейін Алматыдағы “Москва” сауда орталығының Led экранындағы жарнамада “йе” деп қате жазылып кеткені туралы жаздық. Сауда кешеніндегі жарнама бөлімінің басшысы Ербол мырза қате жарнамаға қатысты пікір білдіріп, бірнеше уақыт өткеннен кейін ол жарнаманың бүгін түзелетінін айтты. Әкімшілік өкілі сөз бергендей, қате жарнаманы келесі күні түзеткен.