"Көлігінен 18 қап ақ ұнтақ табылды": Қарағанды облысында командир ірі көлемде есірткімен ұсталды
Желіде Қарағанды облысында № 29108 әскери бөлімінің бөлімше командирі ірі көлемде есірткімен ұсталды деген ақпарат тарады. Бұл туралы Stan.kz ақпарат агенттігі хабарлайды.
Фото: freepik
Бөлімше командирінің ұсталғанын Қарағанды облысының полиция департаменті растады.
Ведомствоның хабарлауынша, 10 қарашада патрульдік полицейлер жол ережесін бұзғаны үшін Балқаш-Сарышаған тас жолында Geely Coolray көлігін тоқтатқан. Белгілі болғандай, жүргізуші 31 жастағы жүргізуші болып шықты. Сондай-ақ ол көлігін нөмірсіз басқарған.
Тексеру кезінде жүк салғышынан жалпы салмағы 12 келіге жуық 18 қап ақ ұнтақ табылды.
"Оқиға орнына жедел-тергеу тобы шақырылып, тыйым салынған заттың бар екенін растады. Қылмыстық іс қозғалып, күдікті ұсталып, уақытша ұстау изоляторына қамалды", – делінген хабарламада.
Сондай-ақ есірткі тасымалдаған әскери қызметкер еңбек демалысында болған. Дивизия командирінің ұсталғаны туралы ақпаратқа Құрлық әскерлерінің баспасөз қызметі түсініктеме берді.
"10 қарашада Сарыөзек гарнизоны әскери бөлімдерінің бірінің демалыста болған әскери қызметкерін Ұлттық қауіпсіздік комитетінің Жетісу облысы бойынша департаментінің қызметкерлері есірткі тасымалдап жатқан жерінде ұстады. Қылмыстық іс қозғалып, жедел-іздестіру шаралары жүргізіліп жатыр. Құрлық әскерлері оқиғаны объективті тексеру үшін құқық қорғау органдарына көмек көрсетіп жатыр", – делінген хабарламада.
№ 29108 әскери бөлімі Жетісу облысы Кербұлақ ауданында орналасқан.
Айта кетейік, бұған дейін Жоғарғы соттың азаматтық істер бойынша сот алқасының төрағасы Нұрсерік Шәріпов сенат кулуарында есірткі жасырушыларға қатысты жазаның жеңілдемейтінін айтқан еді.