Қоғам белсендісі 31 миллионға салынған Қазақстандағы "ең қымбат" дәретхананы көрсетті
Қоғам белсендісі Абай облысында орнатылған құны пәтердікімен бірдей "ең қымбат" дәретхананы көрсетті. Бірақ қыруар қаржыға салынған дәретханада қарапайым унитаз да жоқ болып шықты. Бұл туралы Stan.kz ақпарат агенттігі хабарлайды.
Фото Facebook/saintdid
Дидар Смағұловтың сөзінше, 31 562 600 теңгеге салынған дәретханада қарапайым унитаз да жоқ.
"Ең арзан "Генуя чашасы" орнатылған, былайша айтқанда бұрыңғы замандағыдай тесік. Құжатпен қарастырылған жылыту жүйесі мен интеллектуалды бейне бақылауды да көрмедім. Ақша қайда деген сұраққа Антикор жауап береді деп сенемін", – дейді Смағұлов.
Дәретхана Семейден Қарауылға баратын жол бойында орналасқан.
"Шенеуніктер дәретхананы облыстық маңызы бар жолды күтіп-ұстау жұмыстарына тауар ретінде тығып сатып алған. Бұл – заңбұзушылық. Дәретхана ақылы, алайда әлі күнге дейін төлем жүйелері қосылмаған. Су дұрыс ақпайды, су жүйесінің қысымы нашар", – дейді Смағұлов.
Құжат бойынша, дәретхана ақпан айында АКТ арқылы қабылданып, ақшасы толық төленбеген болып шықты.