Қырғызстанның Жоғарғы соты елдің экс-президенті Алмазбек Атамбаевқа қатысты қылмыстық істі жаңа сот қарауына жіберді, деп хабарлайды Stan.kz ақпарат агенттігі Kaktus.media басылымына сілтеме жасап.

Шешім адвокаттардың өтінішінен кейін қабылданған. Үкімнің жойылуы Алмазбек Атамбаевтың қамаудан босатылуы мүмкін екенін білдіреді.
Жаңадан қарау үшін істің Бірінші Май аудандық сотына жіберілетіні айтылады.

Қазіргі уақытта Атамбаевтың жақтастары ол қамауда жатқан Молдовановкадағы колония маңында жиналып жатыр. Олар бұрынғы президент бүгін бостандыққа шығады деп үміттенеді, деп жазады Sputnik Кыргызстан.

"Атамбаев алдағы 5-10 минутта босатылуы мүмкін, оның заттары көлікке салынған. Адвокаттар Бішкектің Бірінші Май аудандық сотының шешімін алып, колонияға кірді. Оның босатылуын тағатсыздана күтіп тұрмыз", - деген экс-депутат Рыскелді Момбеков.

Алдын ала мәлімет бойынша, сот Атамбаевқа елден шығуға рұқсат берген, мұндай шешім оның сырқатына байланысты қабылданған.

ТАСС басылымына сұхбат берген дереккөз Атамбаевтың бостандыққа шыққанын және қазір үйіне бара жатқанын хабарлаған.

• "Оңбағандар": Алмазбек Атамбаев сот отырысына қатысудан бас тартты


• Қырғызстан президентінің жиені Ішкі істер министрінің қызына үйленді

Еске салайық, Алмазбек Атамбаев 2019 жылдың тамыз айынан бері қамауда отыр. 2006 жылы Азиз Батукаев Бішкек маңындағы колонияда жаппай тәртіпсіздік ұйымдастырды деген айыппен 16 жыл сегіз айға бас бостандығынан айырылған. Тәртіпсіздік кезінде депутат Тынычбек Ақматбаев, жазаны орындау бас басқармасының бастығы Икматулла Полотов және парламенттің екі депутаты қаза тапты. 2013 жылы Батукаев медициналық комиссияның қорытындысы бойынша түрмеден босатылып, оған қан қатерлі ісігінің соңғы сатысы диагнозы қойылған.    Бірнеше сағаттан кейін ол жаңа төлқұжат алып, елден кетіп қалған. Тергеу мәліметінше, оны босатуға жоғары лауазымды тұлғалар, оның ішінде экс-президент Алмазбек Атамбаев қатысқан. Оларға "ұйымдасқан қылмыстық топтың мүддесі үшін сыбайлас жемқорлықты ұйымдастырды" деген айып тағылған.

2020 жылдың маусымында Бішкек аудандық соты Алмазбек Атамбаевты қылмыскер Азиз Батукаевты заңсыз босатқаны үшін кінәлі деп тапты. Экс-президенттің мүлкі тәркіленіп, мемлекеттік наградаларынан айырылып, 11 жыл екі айға бас бостандығынан айырылды. Екі жылдан кейін Атамбаев екі қылмыстық іс бойынша ақталды. Алайда, кейін Жоғарғы сот өз шешімін бұзып, экс-президентке қайта айып таққан.

Алмазбек Атамбаев 2011-2017 жылдары Қырғызстан президенті қызметін атқарған.