"Қырғыз ұлтына қатысымыз жоқ": Димаш Құдайбергеннің әкесі оның руына қатысты қауесетке нүкте қойды

Қазақстандық әнші Димаш Құдайбергеннің әкесі Қанат Айтбаев отбасының руына қатысты тараған қауесетке нүкте қойды. Әнші Facebook парақшасында әулетінің шежіресін жазды, деп хабарлайды Stan.kz ақпарат агенттігі.

Еске салайық, әлеуметтік желіде Димаш Құдайберген қырғыз руының тумасы деген ақпарат тарады. Бұған әншінің бір кездері берген сұхбаты себеп болды.

"Қазақтарда ру деген түсінік бар. Менің руым - қырғыз", - деді Димаш. Бұл Димаштың 2013 жылы "Мейкин Азия" байқауында айтқан сөзі. 

Қанат Айтбаевтың сөзінше, әкесі Құдайберген Жақайым мен Барақ руларының ортақ баласы болып өскен.

Ол әкесі Құдайбергеннің анасы Рахиманың руы Әлімнің ішіндегі — Жақайым, оның ішінде - Быламық екенін атап өтті.

"Ол кісі бойжетіп, Жақайым руының ішіндегі Талпақ, Қырғыз руының жиені Төлеубай деген кісіге тұрмысқа шығады. Екеуі бірнеше бала сүйеді. Сөйтіп жүргенде отызыншы жылдардың аласапыраны басталады. Аштықтың кезінде Төлеубай атамыз өліп, әжеміз бала-шағасын аштан өліп қалмас үшін уақытша балалар үйіне өткізіп, аласапыран заманда олардан көз жазып қалады. Ауылда аман қалған үлкендер ақылдаса отырып, сүйенер тірегінен, бала-шағасынан тірідей айырылған қам көңіл Рахима әжемді Әлімге сіңген қырғыз руының ішіндегі Барақ, оның ішіндегі Тілеубайдан тарайтын, жұбайы қайтыс болған менің атам Айтбайға қосады. Жан-жақтағы ағайын-туыстың сүйемелдеуімен екі жарты бір бүтін болып, түтін түтетеді. Көп ұзамай өмірге менің әкем келеді. Анадай жағдайлардан кейін дүниеге келген бала тіпті тәтті көрінеді ғой, екеуі де: "Бізге бұл баланы Құдай берді..." десе керек. Сөйтіп, екі шаңырақтың өшкен отын тұтатқан сәбиге Құдайберген деген есім беріледі", - деп шежіреден сыр шертті Қанат Айтбаев.

Біраз жылдан кейін Рахима әжейдің балалар үйіне өткізіп жіберген бір ұлы табылады.

"Әкеміз 7-8 жасқа келгенде, тағы бір қуанышты жағдай болыпты. Әжемнің Төлеубайдан туған Аязбай деген ұлы аман табылады. Айтбай атам той жасап, бауырына басқан. Аязбай да мейірімді, елгезек бозбала екен, лезде атама бауыр басады.Менің әкем Құдайбергенді еркелетіп, ертіп жүреді екен.

Бір күні Айтбай атам аттан құлап, мертігеді. Дерті әбден меңдеп, өмірден озар алдында ұлы Аязбайды шақырып алып: "Балам, естияр жігіт болып қалдың, менің уақытым таяған сияқты, інің Құдайберген өзіңе аманат, ешқашан бөлінбеңдер, саған сендім..." деп үзіліп жүре беріпті. Кейінірек анасы да өмірден озыпты. Атамыз қайтқан кезде менің әкем Құдайберген бар болғаны тоғыз жаста екен.

Әке аманатына берік Аязбай атамыз інісі Құдайбергенді жетелеп жүріп өсіріп, Барақтың Тілеубайынан, Жақайымның Талпағынан тарайтын барлық туыс, туғанның мейірімін бойына тең сіңіреді. Әкем Жақайым мен Барақтың ортақ баласы болып ер жетеді", - деді Қанат Айтбаев.

Оның айтуынша, әкесі Құдайберген әскер қатарынан келген соң, ағасының ақ батасын алып Алматы ауылшаруашылық институтына оқуға түседі.

"Оқып жүріп, Ақтөбенің Шалқар өңірінен келген, Әлімнің Шектісінен тарайтын Қабақтың қызы, менің анам Миуамен танысып, шаңырақ көтереді. Екеуінен үш бала өрбідік - мен, әпкем Гүлзира, қарындасым Нұргүл.

Мен 1993 жылы институт бітіріп, Әлімнің Шектісінен, оның ішінде Назар руының Бәшенінен тарайтын Ермекқызы Светамен шаңырақ көтердім. Аллаға шүкір, қазір екі ұлымыз, бір қызымыз бар. Ата-анамызбен бірге бір шаңырақ астында тату-тәтті өмір сүріп жатырмыз", - деді ол.

Қанат Айтбаев қырғыз еліне қатысы жоқ екенін атап өтті.

"Алатаудың бауырын мекендеген қырғыз ұлтына қатысымыз жоқ", - деді әнші.