Қазақстанның ең бай пайдалы қазбалары туралы айтылған 1959 жылға тиесілі аудиотаспа табылды
Қаныш Сәтбаевтың 1959 жылы Мәскеуде өткен КСРО Коммунистік партиясының XXI съезінде сөйлеген сөзінің үзіндісі Павлодардағы мұражай қызметкерлеріне тапсырылды. Бұл туралы Stan.kz ақпарат агенттігі хабарлайды.
Фото: Видеодан алынған скрин
1959 жылы Қазақстан Ғылым академиясының президенті қазақ даласында тұздан басқа құнды ештеңе жоқ деген ескірген пікірді жоққа шығарды. Сәтбаев кеңестік геологтар тобы 200-ден астам көмір кен орнын анықтағанын, оның ішінде Қарағанды, Екібастұз және Майкөбедегі қорлары жүздеген миллиард тоннаға жететін алып кен орындары бар екенін айтты.
Сол кездің өзінде-ақ қазақ ғалымы еліміздің батысындағы мұнай мен газға бай кен орындары туралы білген. Аудиожазба ұзақ жылдар бойы атақты павлодарлық қолөнерші Бақыт Сағындықовтың отбасында сақталған. Жақында оның туыстары облыстық тарихи-өлкетану музейіне ескі аудио таспаны сыйға тартты.
"Қазақстанның жер қойнауында түсті, қара, асыл, сирек металдардың барлық дерлік түрлерінің әлемдік деңгейдегі қорлары, минералды тыңайтқыштар шикізаты, көмір, тұздар, құрылыс материалдары, сондай-ақ мұнай мен табиғи газдың үлкен қоры бар" – деді Мәскеуде өткен съезде Сәтбаев.
Тарихи-өлкетану мұражайы қорының бас тәлімгері Әлия Жомартованың айтуынша, бұл аудиожазба қазір эксклюзивті экспонат.
"Әрине, Қазақстан ғылымы үшін көп еңбек сіңірген атақты ғалымымыздың үнін есту біз үшін өте маңызды. Павлодар өзінің атақты жерлесін мақтан тұтатынын білесіздер. Сондықтан бұл дауыс Қазақстан үшін өте құнды. Бұл бірегей экспонат", - деді ол.