Мұндай нормалар "Қазақстан Республикасының кейбір заңнамалық актілеріне несие берудегі тәуекелдерді азайту, қарыз алушылардың құқығын қорғау, қаржы нарығын реттеу және атқарушылық іс жүргізуді жетілдіру мәселелері бойынша өзгерістер мен толықтырулар енгізу туралы" заңында бекітілген.

"Заңды талқылау барысында бірқатар ескертулер мен ұсыныстар пайда болды. Қаржы нарығын реттеу және дамыту агенттігінің қызметін қаржыландыруды ұлттық банктің бюджетінен қаржыландыруға көшумен, агенттіктің ұлттық банктің қағидалары бойынша сатып алу және бухгалтерлік есеп жүйесіне параллель көшуімен республикалық бюджет шығыстарының құрамынан алып тастау ұсынылды. Осы түзетулердің қабылдануына байланысты заңның тақырыбын сәйкестендіру ұсынылды", – деді сенатор Сергей Карплюк.

"Электронды банктік қарыз" жаңа тұжырымдамасын енгізу алынып тасталды. Себебі бұл тұжырымдама қолданыстағы заңнаманың тиісті нормаларында көзделген.

Мерзімді әскери қызмет өткеру кезеңіне қарызды өтеу бойынша заңда көзделген кейінге қалдыруды 60 күнге ұзарту ұсынылды. Бұл запастағы әскери қызметшіге оны жұмысқа орналастыру және төлем қабілеттілігін қалпына келтіру үшін тиісті уақыт беруге мүмкіндік береді.

Сонымен қатар осы түзетуге байланысты әскерге шақырылушыларға ипотека шарттары, жылжымалы және жылжымайтын мүлік кепілі туралы келісімдер бойынша қосымша шарттар жасасуға қойылатын белгілі бір талаптарды қолданбау ұсынылды.

Ұлттық банк қызметкерлерін өкілдер кеңесінің құрамына енгізуге байланысты банк және микроқаржы омбудсменін сайлауға қосымша талаптар белгіленді.

Мемлекет қатысатын несиелік бюролардың қызметін реттейтін ережелер нақтыланып, инкассаторлар кредиттік бюроға беретін қосымша ақпараттар беріліп жатыр.

Ломбардтармен шарт жасасу кезінде олардың қызмет ерекшеліктеріне байланысты несие алудан ерікті бас тартуға қатысты нормалар сәйкестендіріледі.

Сенаторлар енгізген түзетулерге байланысты құжат мәжіліске қайтарылды.

Талқылау