Қазақстанда оннан аса порностудия ашқан қылмыстық топ әшкереленді
Шымкент полицейлері нақты уақыт режимінде интернет арқылы порнографиялық қызмет ұсынумен айналысқан қылмыстық топты құрықтады. Бұл туралы бүгін полиция департаменті бастығының орынбасары Арман Бейсенбаев мәлімдеді, деп хабарлайды Stan.kz ақпарат агенттігі Polisia.kz басылымына сілтеме жасап.
Арман Бейсенбаевтың сөзінше, 2021 жылдың шілде айында құқық қорғау органының қызметкерлері онлайн хабар тарататын порностудияны анықтады.
"Біз бұл ақпаратқа қызығушылық танытып, жарты жыл ішінде барлық қажетті іздеу шараларын жүргіздік. Нәтижесінде Алматы, Нұр-Сұлтан және Шымкент қалаларының тұрғындарын анықтадық, оның ішінде 5 Қырғызстан және 6 Қазақстан азаматы бар. Біз оларды үш мегаполистің жалдамалы пәтерлерінде ұстадық”, – деді Арман Бейсенбаев.
Қазіргі уақытта соттың шешімімен барлығы 11 адам қамауға алынды. Олардан шамамен 44 мың АҚШ долларын құрайтын ақша, екі қымбат Toyota Camry 70 және бір Lexus GX 460 көлігі тәркіленді.
"Аталған іс ҚР Қылмыстық кодексінің екі бабы “Ұйымдасқан қылмыстық топты ұйымдастыру және оған басшылық ету” және “Кәмелетке толмағандардың порнографиялық бейнелері бар материалдарды дайындау және тарату немесе оларды порнографиялық сипаттағы ойын-сауық іс-шараларына қатысуға тарту” бойынша тіркелді. Бұл қылмыстық топты ұйымдастырып, басқарған Қырғызстан азаматын тінту барысында одан және оның жерлестерінен есірткі заттарын тәркіледік. Ұйымдасқан қылмыстық топтың әрбір мүшесі өз міндетін атқарып отырған”, – деп қосты Полиция департаменті басшысының орынбасары
Полицейлердің мәліметінше, қылмыскерлер жалдамалы пәтерлерде 10-нан астам веб-порностудия ұйымдастырған. Қазақстанда мұндай порностудиялар алғаш анықталып отыр.
"Онда 50-ге жуық қыз жұмыс істеген, оның ішінде кәмелет жасқа толмаған екі жасөспірім бар. Сондай-ақ, олардың көпшілігі есірткі пайдаланады. Аталған веб-порностудияның аудиториясында негізінен шетел азаматтары болған және қызмет ақысын шетел валютасымен төлеген. Қазақстанда нақты уақыт режимінде жұмыс істеген порностудия алғаш рет анықталғанын атап өткім келеді. Бүгінде бұл ұйымдасқан қылмыстық топтың трансұлттық сипатқа ие болуы мүмкіндігін жоққа шығармаймыз. Қазір сотқа дейінгі тергеп-тексеру амалдары жүріп жатыр", – деп қорытындылады Бейсенбаев.