Жақында Экология министрлігі Қазақстандағы киіктердің саны аулау және ату арқылы реттелетінін хабарлады. Шенеуніктер елімізде сирек кездесетін ақбөкен етін заңды түрде сатуға болатынын атап өтті. Алайда мүйізді сатуға қатысты мәселе ашық күйінде қалды. Министрге желіде ақбөкен мүйізін Қытайға экспорттайтыны туралы ақпарат тарап жатқаны және ақбөкенді шығыс елдері дәрі-дәрмек жасау үшін пайдаланатыны рас па деген сауал жолданды.

Мұны министр Нысанбаев растады. Оның айтуынша, мүйіздер қазір сатылмайды.

"Ақбөкен мүйіздері – дәстүрлі түрде Шығыс елдерінде, негізінен Қытайда фармацевтиканың құрамдас бөлігі.
Бүгінде біз оларды экспорттай алмаймыз, өйткені CITES халықаралық ұйымы жануарлардың, соның ішінде ақбөкендердің кейбір түрлерінің мүйізі мен дериваттарын экспорттауға тыйым салған", – деді министр.

Нысанбаев Қазақстанның қоршаған ортаны қорғау министрлігінің шенеуніктері ақбөкен мүйізін сатуға рұқсат алу үшін Швейцарияда жүргенін айтты. Экспортты 2025 жылы бастау жоспарлануда.

"Біз келіссөздер жүргізіп жатырмыз, комитет төрағасының орынбасары Женевада, CITES-тің орталық кеңсесінде, жабайы табиғат комитетінде, киіктердің бөліктері мен дериваттарын экспорттауға салынған тыйымды алып тастау мәселесі талқыланып жатыр. Рұқсат алудың болжамды мерзімі - 2025 жыл. Біз оны қазір сатпаймыз, бірақ болашақта ақбөкеннің мүйізін сыртқы нарыққа сатуды жоспарлап отырмыз", – деді ол.

Айта кетейік, бұған дейін Әлеуметтік желіде БҚО-да белгісіз біреулердің көп мөлшердегі ақбөкен етін сатуға ұсынып жатқаны туралы хабарламалар тараған еді. Алайда "Охотзоопром" РМК олардың популяциясын реттеу аясында киіктерді атуға әлі кіріспегендерін мәлімдеді.

Талқылау