Қайрат Нұртас ұшақтағы төбелес салдарынан қанша қаржысын жоғалтты
Елімізде шоу-бизнес өкілдері арасында заңбұзушылық жиілеп кетті. Нәтижесінде жұлдыздар тұтқынға алынып, бірнеше тәулікке қамауға алынып жатыр. Тіпті олар сахнаға шықпай жатып үлкен шығынға ұшырап жатыр. Олардың шығыны қанша болды деген сауалға продюсер Алтынбек Рахметов жауап берді. Бұл туралы Stan.kz ақпарат агенттігі Inform сайтына сілтеме жасап хабарлайды.
Фото: Instagram kair_n
Продюсер қамауға алынған өнер адамдарын халық біржола жек көріп кетпейтінін айтты.
“Тұрсынбек қамаудан шыққан бойда үлкен концерт берді. Концерттерде қамауға алынғаны туралы әзілдеп, көрермендердің қошеметіне бөленді. Бостандыққа шыққан соң Қайрат Нұртас пен Әбдіғаппар Әлқожа да концерт берсе, зал лық толы болатынына сенімдімін. Ұсақ құқықбұзушылықтары үшін халық оларды жек көріп кетпейді”, – дейді белгілі продюсер Алтынбек Рахметов.
Алайда, Қайрат Нұртас 19 шілдеде Ақсу қаласы мен Металлургтер күніне арналған концертте өнер көрсетуі керек еді.
“Концерттің ұйымдастырушысы болғандықтан, Қайрат Нұртас бұл шараға шыққаны үшін берілетін 5 миллион теңгеден қағылды деп айта аламын. Оның басқа концерттерінен хабарым жоқ. Кей әншілер той-томалаққа аптасына бір рет барады. Кейбірі дерлік әр қалада өтетін тойларға қатысады", – дейді Рахметов.
Той ұйымдастырушылардың айтуынша, Қайрат Нұртастың гонорары кем дегенде 2,5 миллион теңге. Тұрсынбек Қабатов тойда тостмейстер болып 10-15 мың доллар табады.
Әбдіжаппар Әлқожа бұған дейінгі сұхбатында қаламақы көлемін айтудан бас тартқан еді.
“Менің қаламақым біреулер үшін аз ғана болса, біреулер үшін бір жылдық жалақы. Төлем сомасын айтпай-ақ қояйын. Өйткені қоғамда адамдардың табыс деңгейі әртүрлі. Алым сомасын айтсам, ол біреуге көп немесе керісінше тым аз болып көрінуі мүмкін. Сондықтан бұл құпия болып қалсын", – деді әнші.
Айта кетейік, бұған дейін Тұсынбек Қабатов ұшақта жанжал шығарғаны үшін 5 тәулікке қамауға алынған еді. Әзілкештің ізін ала Қайрат Нұртас ұшақта төбелесіп 15 тәулікке қамалған. Кейіннен әнші Әбдіжаппар Әлқожа полиция қызметкерлеріне бағынбағаны үшін Қонаевта ұсталып, 10 тәулікке қамалған еді.