Қайрат Боранбаев құны 1,4 миллиард теңгеден асатын қонақүй кешенін мемлекетке қайтарды
Тергеу мен ерікті ынтымақтастық аясында қаржы мониторинг агенттігі Қайрат Боранбаевтың мүлкін мемлекетке қайтару шараларын қабылдауда. Бұл туралы Stan.kz ақпарат агенттігі хабарлайды.
Видеодан скриншот
Қайрат Боранбаевтың компаниялары мемлекеттік мүлік комитетіне жалпы құны 1,4 миллиард теңгеден асатын "Comfort Hotel Astana" қонақүй кешенін мемлекет меншігіне өз еркімен беру үшін тиісті өтінімдер берді. Аумағы 5 мың шаршы метрден асатын бұл қонақүй кешенінің жылдық айналымы 900 миллион теңгеге жуықтайды.
Қолданыстағы заңнамаға сәйкес бұл нысанды демалыс, сауықтыру және білім беру орталықтарын ұйымдастырумен әлеуметтік мақсатта пайдалану жоспарлануда. Активтерді қалпына келтіру жұмыстары жалғасып жатыр.
Айта кетейік, өткен жылдың наурыз айында Қаржы мониторингі агенттігі Қайрат Боранбаевқа қатысты квазимемлекеттік сектордағы аса ірі көлемдегі қаражатты ұрлау фактісі бойынша тергеуді бастаған болатын. 17 наурызда елордалық сот Қайрат Боранбаевтың қамауға алынғанын хабарлады. Ол "ҚазТрансГаз" АҚ-ның ақшасын жымқырғаны үшін 6 жылға сотталды. Кейін кәсіпкер Ақмола облысындағы қауіпсіздігі орташа колонияға ауыстырылды.
Еске сала кетейік, бұған дейін Қайрат Боранбаевқа тиесілі Phystech II мұнай компаниясы мемлекет меншігіне өткен еді.