Кашмирде Үндістан мен Пәкістан арасындағы қақтығыс ушықты – БАҚ

Фото: Stringer/Reuters

Үндістан мен Пәкістан Кашмирде қарқынды атысты бастады. Бұл туралы Stan.kz ақпарат агенттігі Euronews.com сайтына сілтеме жасап хабарлайды. 

Кашмир ресми шекаралық келісімдермен белгіленбеген. Кашмир – Үндістан мен Пәкістанның арасындағы шиеленіс ошағы. Енді онда артиллериялық зеңбіректер қолданылғаны хабарланды.

Үндістан мен Пәкістан әскерлері Кашмирдегі даулы шекарада  оқ жаудырды. Шиеленіс жалғасып жатыр, кем дегенде бес бейбіт тұрғын қаза тапты.

Жергілікті полиция офицері Адиль Ахмадтың айтуынша, Үндістаннан келген ауыр артиллериялық оқтан Пәкістан басқаратын Кашмирде төрт бейбіт тұрғын қаза тауып, 12 адам жараланған. Жергілікті тұрғындардың айтуынша, атқылау жұма күні таңертеңге дейін жалғасқан.

"Біз Пәкістан мен Үндістан арасындағы бақылау сызығындағы қырқысқа үйреніп қалдық, бірақ өткен түн басқаша болды", – деді шекараға жақын орналасқан Чакоти ауылының тұрғыны Мохаммад Шакил.

Үндістанның әскери шенеуніктері Пәкістан әскерлерінің бірнеше жерде артиллерия, миномет және автоматтар арқылы өз позицияларына оқ жаудырғанын хабарлады. Үндістандық күштер жауап қайтарып, шайқас таң атқанша жалғасты.

Ури аймағында бір әйел қаза тауып, екі бейбіт тұрғын жараланды.

Еске салсақ, 7 мамырға қараған түні Үндістан Пәкістанға зымырандық шабуыл жасап, 24 нысанға соққы жасаған еді. Артынша Пәкістан қарулы күштері де Үндістанға әуе шабуылын жасады. 8 мамырда Қазақстанның сыртқы істер министрлігі әскери қақтығысқа қатысты мәлімдеме жасап, екі елдегі қазақстандықтардың эвакуацияланбайтынын айтты.